Úsh aıda Ulttyq qordan 984 mlrd teńge alynǵan

ASTANA. QazAqparat – Qarjy mınıstrligi Ulttyq qordyń túsimderi men shyǵystary týraly 1 sáýirdegi esebin jarııalady, dep habarlaıdy QazAqparat tilshisi.

Mınıstrlik málimetinshe, 2023 jyldyń 1 qańtarynda Ulttyq qorda 29,1 trln teńgeden astam (29 176 508 444 000) qarajat bolǵan.

Al 1 sáýirdegi jaǵdaıy boıynsha 29,3 trln teńgege (29 391 788 468 000) jetken.

Úsh aıdyń ishinde Ulttyq qorǵa 1,1 trln teńgeden astam (1 199 306 040 000) kiris túsken.

Onyń ishinde munaı sektoryndaǵy uıymdardan tikeleı Ulttyq qorǵa aýdarylatyn salyqtan 1 197 058 132 000 teńge túsken.

Al munaı sektoryndaǵy uıymdarǵa salynatyn aıyppuldar men ósimpuldardan, munaı óndirisinen tabıǵatqa keletin zııan úshin tólenetin alymdardan jalpy jıyny 800 mln teńgeden astam (800 068 000) aqsha túsken.

Sondaı-aq;

- respýblıkalyq menshikti jekeshelendirýden 219 895 000 teńge;

- aýyl sharýashylyǵy maqsatyndaǵy jer ýchaskelerin satýdan 7 945 000 teńge;

- Qazaqstan zańnamasymen tyıym salynbaǵan ózge de túsimder men kiristerden 1 220 000 000 teńge túsken.

Jyldyń alǵashqy úsh aıynda Ulttyq qordyń 984 mlrd teńgeden sál asatyn (984 026 016 000) qarajaty paıdalanylǵan.

Bul qarajattyń 621 mlrd teńgesi - kepildik berilgen transfertterge, 360 mlrd 620 mln teńgesi - maqsatty transfertterge, 2,4 mlrd teńgeden astam (2 406 016 000) qarajaty - Ulttyq qordy basqarýǵa jáne jyl saıynǵy syrtqy aýdıtti júrgizýge baılanysty shyǵystardy jabýǵa jumsalǵan.