Úsh aıda otandyq áýe kompanııalary 2 mln jolaýshy tasymaldady

NUR-SULTAN. QazAqparat - Tasymaldanǵan jolaýshylar sany byltyrmen salystyrǵanda 5% artty. 2021 jyly bul kórsetkish 1,9 mln jolaýshyny quraǵan bolatyn. Sonymen qatar, kórsetkishtiń pandemııa bastalǵan 2020 jylǵa deıingi ósimi baıqalady. Ósim - 17%, dep habarlaıdy QazAqparat.

Azamattyq avıatsııa komıteti málimetine sensek, qańtar-naýryzda otandyq áýe kompanııalary ishki jelilerde 1,5 mln jolaýshy (2021 – 1,7 mln jolaýshy, 2020 – 1,1 mln jolaýshy), halyqaralyq jelilerde – 500 myń jolaýshy (2021 – 400 myń jolaýshy, 2020 – 400 myń jolaýshy) tasymaldaǵan.

Jolaýshylar aǵyny Air Astana kompanııasynda 800 myńǵa jýyq jolaýshyny, FlyArystan men SCAT kompanııalarynda 500 myńǵa jýyq jolaýshyny qurady.

Úsh aıda áýejaılarda qyzmet kórsetilgen jolaýshylar sany - 3,7 mln. Bul ótken jyldyń kórsetkishinen 2% artyq.

Búgingi kúni ishki áýe reısterin 5 otandyq áýe kompanııasy aptasyna 613 reıs jıiligimen 57 baǵyt boıynsha oryndaıdy.

Halyqaralyq reıster 77 baǵyt boıynsha 24 elge qatynaıdy. Jıiligi - aptasyna 319 reıs.

Bul - Túrkııa, BAÁ, Ózbekstan, Grýzııa, Tájikstan, Reseı, Qyrǵyzstan, Belarýs, Germanııa, Egıpet, Ońtústik Koreıa, Nıderlandy, Polsha, Armenııa, Ulybrıtanııa, Maldıv araldary, Taıland, Ázirbaıjan, Katar, Kýveıt, Saýd Arabııasy, Mońǵolııa, Úndistan, Iran elderi.