Úsh aıda qazaqstandyq et eksporty 2,5 esege ósti - A. Mamytbekov

ASTANA. QazAqparat - 2015 jyldyń 3 aıynda Qazaqstandaǵy et jáne et ónimderin eksporttaý kólemi 2014 jyldyń sáıkes kezeńimen salystyrǵanda 2,5 esege ulǵaıdy. Bul týraly búgin OKQ baspasóz-máslıhatynda QR Aýyl sharýashylyǵy mınıstri Asyljan Mamytbekov aıtty.

«Bizde «salqyndatylǵan» sıyr etiniń 2014 jylǵy eksporty 2013 jylǵydan 6 ese ósken. Al «muzdatylǵan» sıyr etinen 615 tonna syrtqa shyǵaryldy, 2013 jyly mundaı et múldem eksporttalmady deýge de bolady. Sonymen qatar, sıyr etiniń ımporty 42,3 paıyzǵa azaıdy. Eger 2013 jylǵy ımport 24 myń tonna bolsa, 2014 jyly bul kórsetkish 16,8 myń tonna boldy», - dedi A.Mamytbekov. Onyń aıtýynsha, osyǵan uqsas oń tendentsııa bıyl da baıqalyp otyr. «2015 jyldyń 3 aıynda et pen et ónimderiniń eksporty 2014-tiń sáıkes kezeńimen salystyrǵanda 2,5 ese artty. Іrimshik pen aq irimshiktiń eksporty 4,6 ese ósti. Sondyqtan bul tendentsııa budan ári de jalǵasa beredi dep úmittenemiz», - dedi mınıstr.