Úsh aı ishinde Túrkistan oblysynda jol kólik oqıǵalarynan 50 adam qaza tapty

TÚRKІSTAN. QazAqparat- Túrkistan oblysynda úsh aı ishinde jol kólik oqıǵalarynan 50 adam qaza taýyp, 139 adam túrli dene jaraqatyn aldy, dep habarlaıdy QazAqparat tilshisi.

Jyl basynan beri Túrkistan oblysynyń aýmaǵynda 127 jol-kólik oqıǵasy tirkelgen. Saldarynan 50 adam qaza taýyp, 139 adam túrli dene jaraqatyn alǵan.

Polıtsııa qyzmetkerleriniń aıtýynsha, jol-kólik oqıǵalarynyń negizgi sebepteri jyldamdyqty arttyrý, qarsy qozǵalys jolaǵyna shyǵý, avtokólikti mas kúıinde basqarý, kólikti basqarý quqyǵy joq kámeletke tolmaǵandarǵa berý, sondaı-aq jol boıynda tórt-túliktiń qaraýsyz jaıylýy bolyp otyr.

Búginde profılaktıkalyq jumystardyń barysynda tártip saqshylary aýyl aımaqty aralap, jergilikti turǵyndarmen kezdesýde. Basty maqsat - turǵyndar arasynda jol qozǵalysy erejelerin túsindirý.

Búgin Túrkistan oblystyq polıtsııa departamenti bastyǵynyń birinshi orynbasary B.Aıtpaev Saýran, Sozaq aýdandarynda boldy.

Jergilikti turǵyndarǵa jol erejelerin túsindirgen polıtseıler joldarda muqııat bolý qajettigin eskertip, kópshilikti jol qozǵalysy erejelerin saqtaýǵa shaqyrdy.