Úsh aýysymdy mektepter sany úsh jylda 32 paıyzǵa artqan

ASTANA. QazAqparat – Bir jyl ishinde elimizde úsh aýysymdy mekteptterdiń sany 5,6 paıyzǵa artyp ketti, dep habarlaıdy QazAqparat tilshisi.

Ranking.kz portalynyń dereginshe, 2021-2022 oqý jylynyń basynda elimizde 7,6 myń mektep boldy.

Onyń 2,3 myńy qalada, 5,3 myńy aýyldyq jerlerde ornalasqan.

Olarda 3,6 mln oqýshy bar, bul bir jyl burynǵydan 3,3 paıyzǵa kóp. Qalalarda 2,1 mln, aýyldarda 1,5 mln oqýshy mektepke barady.

Elimizdiń bilim berý salasynda birqatar sheshimin tappaǵan másele bar. Onyń ishinde oqýshy ornynyń tapshylyǵy eń ótkir bolyp tur.

Qazir mektepterdiń kópshiligi oqýshylardy eki aýysymda oqytady. Mundaı mektepterdiń sany jyldan jylǵa artyp keledi.

Máselen, 2021-2022 oqý jylynda elimizde 5,2 myń osyndaı mektep jumys istese, 2020-2021 oqý jylynda — 5,1 myń, odan bes jyl buryn, 2017-2018 oqý jylynda 4,9 myń eki aýysymdy mektep bolǵan.

Sonymen qatar, elimizde úsh aýysymda oqytatyn mektepter sany da artyp keledi. Bul onsyz da daǵdarysty jaǵdaıdyń nasharlaǵanyn kórsetedi.

Máselen, 2021-2022 oqý jylynda Qazaqstanda 169 úsh aýysymdy mektep jumys istedi.

Bul bir jyl burynǵydan 5,6 paıyzǵa (160 mektep) artyq, al úsh jyl ishinde mundaı mektepterdiń sany birden 32 paıyzǵa ósti.

Eger oqýshy sanyna qatysty jaǵdaıdy qarastyratyn bolsaq, onda máseleniń aýqymy aıqynyraq kórinedi.

Máselen, sońǵy málimetter boıynsha úsh aýysymdaǵy mektepterde 291,1 myń oqýshy bilim alyp júr. Bul ótken jylmen salystyrǵanda 4,9 paıyzǵa kóp.

Óńirler boıynsha úsh aýysymdy mektepterdiń eń kóbi Almatyda (59 mektep), sondaı-aq Mańǵystaý (18 mektep), Atyraý (17 mektep), Túrkistan (15 mektep) jáne Pavlodar (10 mektep) oblystarynda baıqalady.

Elimizdegi oqýshylar ornynyń, sondaı-aq úsh aýysymdy jáne apatty mektepterdiń tapshylyǵy máselesin sheshý úshin Memleket basshysynyń tapsyrmasymen «Jaıly mektep» ulttyq pılottyq jobasy iske qosyldy.

Ony 2023 jyldan 2025 jylǵa deıin iske asyrý josparlanǵan. Ulttyq jobanyń biryńǵaı operatory retinde «Samruk-Kazyna Construction» AQ tańdaldy.

Ulttyq jobany júzege asyrýdyń arqasynda respýblıkada 842 myń oqýshy oqıtyn 401 jańa mektep salynady.

2023 jyly 467,8 myń oqýshyǵa arnalǵan 221 mekteptiń qurylysyn bastaý josparlanǵan.

Jalpy jobany júzege asyrýǵa 2,6 trln teńge memleket ınvestıtsııasy baǵyttalady.