Úsh aýysymdy, apatty mektepterdiń basym bóligi aýyldarda ornalasqan
«Búgingi tańda úsh aýysymda oqytatyn mektepterdiń 57%-y aýyldyq jerde ornalasqan. Kópshiligi Almaty jáne Túrkistan oblystarynda. Avarııalyq mektepterdiń 76%-y da aýyldyq eldi mekenderde. Olar negizinen Aqtóbe, Qyzylorda, Batys Qazaqstan jáne Túrkistan oblystarynda», - dedi O.Bektenov Úkimet otyrysynda.
Sonymen birge, Premer-mınıstrdiń aıtýynsha, shaǵyn jınaqty mektepterde muǵalimderdiń jetispeýine baılanysty bir pedagog birneshe pándi oqytady. Ásirese matematıka, fızıka, shet tilderi pánderinde biliktiligi joǵary mamandar az.
«Nátıjesinde bul eń basty másele – aýyl men qala mektepteriniń arasyndaǵy oqytý sapasynyń alshaqtyǵyna alyp keldi. Óńir ákimdikteri ártúrli úıirmeler men sektsııalardyń qoljetimdi bolýyn qamtamasyz etý úshin 2025 jyldyń qyrkúıegine deıin mektepten tys uıymdardyń komıýnıtı-ortalyqtaryn nemese fılıaldaryn ashý jumysyn aıaqtaýy qajet. Tsıfrlyq damý mınıstrligi óńir ákimdikterimen birlesip, 2025 jylǵy 1 qyrkúıekke qaraı aýyl mektepterin jyldamdyǵy joǵary ınternetke qosýdy aıaqtasyn. Qajet bolǵan jaǵdaıda shalǵaı óńirlerdegi jelilerdi tezirek jańǵyrtý úshin jeke baılanys operatorlaryn tartý qajet», - dedi Premer-Mınıstr.
Aıta keteıik, aýyldyq aýmaqtardy damytý tujyrymdamasy sheńberinde 2027 jylǵa deıin 180-ge jýyq mektep salý josparlanǵan. Bıyl «Jaıly mektep» ulttyq jobasyn qosa alǵanda, aýyldarda 42 mektep paıdalanýǵa berildi.
Elimizdegi 8 myńǵa jýyq mekteptiń 67% nemese 5247-si – aýyl mektebi. Oqýshylardyń 40% aýyl mektebinde bilim alady.