Úsh árip - GGG: Golovkınge arnap jankúıeri án shyǵardy

ASTANA. QazAqparat - Astanalyq rep oryndaýshy Ermek Jumabekuly Gennadıı Golovkınniń kezekti jekpe-jegine oraı arnaıy án shyǵaryp, oǵan klıp túsirdi, dep habarlaıdy QazAqparat tilshisi.

Ermek Jumabekulynyń mamandyǵy saıasattanýshy bolǵanymen mýzykamen de aınalysady. Ermek Genanyń naǵyz jankúıeri. Oǵan dálel súıikti sportshysyna osymen úshinshi shyǵarmasyn arnady. Ol barlyq ániniń sózin ózi jazady. Ermektiń rep stılinde aıtatyn buǵan deıingi eki týyndysy orys tilinde shyqty. Al úshinshisi kúni keshe ǵana «Úsh árip: GGG-3» degen ataýmen qazaq tilinde jaryq kórdi. Sonymen qatar repke arnap klıp te túsirip úlgerdi.

«Іs-shara, kontsertter uıymdastyrýshysy qyzmetin atqaratyndyqtan, mýzyka salasy júregime jaqyn, bos ýaqytymda stýdııada án jazamyn. Jalpy Gennadııge án arnap shyǵarý ıdeıasy osydan bir jyl buryn paıda boldy.  Al, «Úsh árip: GGG-3»-ke kelsem rep shyǵarý týraly uzaq oılanyp júrdim. Jekpe-jekke eki apta qalǵanda qazaq tilinde shyǵaramyn dep sheshim qabyldap, iske kiristim. Keshe tolyq bitirip, ıýtýb jelisine júktedim, - dedi QazAqparat tilshisine bergen suhbatynda Ermek Jumabekuly. 
 

G.Golovkınniń birde-bir jekpe-jegin jibermeı kóretin Ermek, sanaýly saǵat qalǵan kezekti aıqasty da asyǵa kútip otyrǵanyn aıtyp, boksshyǵa jeńis tiledi.

Aıta keteıik, búkil álem nazary aýyp otyrǵan aıtýly jekpe-jek 15 qyrkúıekte (Qazaqstanda 16 qyrkúıekte tańerteń) Las-Vegastaǵy T-Mobile Arena-da ótedi.