Úsh agrarlyq JOO-ǵa álemniń ozyq standarttary engiziledi

ASTANA. QazAqparat - Elimizdiń úsh agrarlyq bilim ordasyna álemniń ozyq joǵary oqý oryndarynyń standarttary engiziledi. Bul týraly Elbasy Joldaýynan týyndaıtyn tapsyrmalardy oryndaý máseleleri qaralǵan QR Úkimetiniń keńeıtilgen otyrysynda belgili boldy, dep habarlaıdy QazAqparat tilshisi.

Úkimet Memleket basshysynyń eńbek ónimdiligin jáne óńdelgen ónim eksportyn 2,5 esege arttyrý týraly tapsyrmalaryn oryndaý boıynsha jumystardy qolǵa aldy. Osylaısha, Agroónerkásiptik keshendi damytýdyń ózektilendirilgen memlekettik baǵdarlamasy aıasynda salanyń básekege qabilettiligin arttyrý jáne ony tehnologııalyq qaıta jaraqtaý boıynsha qajetti sharalar qabyldanatyn bolady. Osy maqsattarǵa qosymsha jyl saıyn keminde 100 mlrd teńge bólinip otyrady, bul agroónerkásiptik keshen aldyna qoıylǵan mindetterdi tolyq iske asyrýǵa múmkindik beredi.

Sýbsıdııalaý júıesin ózgertýge qatysty jumystar júrgiziledi. Tıimsiz sýbsıdııalar qysqartylady. Al qalǵan sýbsıdııalar barynsha jeńildetilip, jyldyń sońyna deıin tolyq avtomattandyrylady. Reformalaý qorytyndysy boıynsha 54 sýbsıdııanyń ornyna 34 sýbsıdııa túri qalady.

Agrarlyq ǵylym men bilimdi bıznestiń qajettilikterine baǵyttaı otyryp, reformalaý jáne tehnologııalardy transfertteý sharalary qolǵa alyndy. Úsh baǵytta jumys istelip jatyr, olar - bilim, ǵylym jáne bilim taratý júıesi. Agrarlyq bilim berýdiń sapasyn jaqsartý maqsatynda úsh agrarlyq oqý orny bilikti mamandar daıarlaý isine jumyldyrylyp jatyr. Olarǵa Nazarbaev ýnıversıtetiniń úlgisimen álemdik ozyq joǵary oqý oryndarynyń standarttary engiziledi jáne sheteldik oqý oryndarynyń franshızalary tartylady.

Nátıjesinde AÓK sýbektilerin1,5-2-den 20-25 paıyzǵa deıin qamtý kózdelgen.