Úsh adamnyń ómirin qıǵan Almatydaǵy kólik apaty: Jańa aıaldama salynady

<p>22 jeltoqsanda Almatyda avtobýs aıaldamaǵa soǵylyp, úsh adam qaza tapqan edi. Qala ákimdigi kisi ólimi oryn alǵan aıaldama qalaı ózgeretini týraly aıtty, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Almaty qalalyq ákimdiginen atap ótkendeı, qazirgi tańda Qalqaman yqshamaýdany, Raıymbek dańǵylynyń boıynda ornalasqan №7 qalalyq aýrýhanaǵa aıaldamasyna kólik torabyn salý jobasy ázirlenip jatyr.

«Ol eki bloktan turady jáne jerasty jaıaý júrginshiler ótkeline qosylady. Jolaýshylarǵa arnalǵan eki otyrǵyzý alańy qarastyrylǵan. Joba 2022 jyldyń ortasynda qolǵa alyndy, búginde jobalyq qujattama memlekettik saraptamadan ótýde. Joba 2024 jyly aıaqtalady dep josparlanǵan»,- dep habarlady ákimdikten.

Sondaı-aq joba qalalyq jáne qalaaralyq avtobýstardy biriktiredi. Bul jolaýshylarǵa bir avtobýstan ekinshisine jyldam ári yńǵaıly aýysýǵa múmkindik beredi.

«Kólik torabynda aqparattyq stendter, keste jazylǵan dıspleıler jáne kólik qozǵalysy týraly jańartylǵan aqparat bolady. Bul jolaýshylarǵa jyldam baǵdarlaýǵa jáne saparlaryn josparlaýǵa kómektesedi. Qaýipsiz jaıaý júrginshiler joldaryn, veloturaq pen qoǵamdyq oryndardy uıymdastyrýǵa basty nazar aýdarylady»,- dep atap ótti ákimdikten.

Eske salaıyq, Almatyda avtobýs bir top adamdy qaqqan edi. Polıtsııanyń málimetinshe, №47-shi baǵyttaǵy qoǵamdyq kóliktiń ishindegi jolaýshy janjal shyǵaryp, júrgizýshi áıeldi urǵan. Saldarynan ol esinen tanyp, kólikti basqara almaı qalǵan.

Apat saldarynan 7 adam zardap shekti. Jedel medıtsınalyq qyzmet kelgenshe úsheýi qaıtys boldy.

Sondaı-aq, Almatyda avtobýs júrgizýshisin urǵan jolaýshyǵa qatysty qylmystyq is qozǵaldy.

Keıin qalalyq sot kúdiktiniń eki aıǵa qamaýǵa alynǵanyn málim etti.