US Open: Elena Rybakına men Aleksandr Býblık bastapqy kezdesýlerin ótkizedi
Qazaqstannyń kóshbasshy tennısshileri Elena Rybakına men Aleksandr Býblık alǵashqy kúni-aq kortqa shyǵady.
Tennıs dodasyn Astana ýaqytymen saǵat 21.00-de álemniń 27-raketasy Aleksandr Býblık pen qazirgi kezde dúnıejúzilik reıtıngte 81-orynda turǵan aýstrııalyq, 2020 jylǵy US Open chempıony Domınık Tım ashpaq.
Qarsylastar osyǵan deıin 2019 jylǵy Rolan Garros týrnırinde kezdesip, onda aýstrııalyq sportshy 6:3, 6:7 (6:8), 6:3, 7:5 esebimen basym túsken-di.
Domınık Tım jaraqatyna baılanysty 2021 jyldyń jazynan 2022 jyldyń kóktemine deıin oınaǵan joq. Onyń kortqa qaıta oralýy ońaıǵa túspeı, bastapqy jeti matchynda jeńilip qaldy. Bıyl ol Ýımbldonnan keıin Aýstrııada ótken Kıttsbıýl ATR 250 jarysynyń fınalyna deıin jetti.
Aleksandr Býblık Germanııadaǵy Galle ATR 500 týrnırinde jeńimpaz atanyp, Ýımbldonda birshama sátti óner kórsetkennen keıin Vashıngton (AQSh) men Torontoda (Kanada) alǵashqy aınalymnan asa almady.
Qazaqstandyqtar álemniń 4-raketkasy Elena Rybakınaǵa úlken úmit artyp otyr. Ótken jyly bastapqy kezdesýinde-aq kútpegen jerden utylyp qalǵan E.Rybakınanyń bıylǵy qarsylasy ońaı shaǵylatyn jańǵaq emes. Álemniń 39-raketkasy, ýkraınalyq, 21 jastaǵy Marta Kostıýk jyl basynda Aýstralııanyń Adelaıda qalasynda 1/8 fınalda Elenany 6:7 (5:7), 6:2, 6:3 esebimen jeńip ketken.
Bul oıyn 29 tamyzǵa qaraǵan túni shamamen saǵat 00.15-te bastalady. Onyń ýaqyty aldaǵy básekelerdiń qashan bitýine baılanysty.
A.Býblık te, E.Rybakına da bastapqy kezdesýlerin AQSh ashyq chempıonatynyń úshinshi korty bolyp sanalatyn, 8 myńnan astam jankúıer syıatyn Grandstand arenasynda ótkizedi. Qos sportshy qarsylastarynan qarymta qaıtara ala ma, ony aldaǵy oıyndar kórsetedi.
Jekeleı synda Qazaqstannan sondaı-aq ıÝlııa Pýtıntseva men Tımofeı Skatov óner kórsetedi. Olar jarystyń ekinshi kúni dodaǵa qosylady. Reıtıngte 78-oryndaǵy ıÝ.Pýtıntsevanyń qarsylasy – álemniń 58-raketkasy, ıtalııalyq Martına Trevızan. Al irikteý saıystarynan negizgi týrnırge ótken T.Skatov álemniń 13-raketkasy, aýstralııalyq Aleks De Mınaýrmen synǵa túsedi.
Eske sala keteıik, budan buryn qazaqstandyq tennısshiniń Taılandtaǵy týrnırdiń chempıony atanǵanyn jazǵan bolatynbyz.