US Open: Aleksandr Býblık 19 jastaǵy tennısshiden jeńilip qaldy

<p>ASTANA. KAZINFORM — Qazaqstannyń birinshi, álemniń 27-raketkasy Aleksandr Býblık AQSh ashyq chempıonatynyń ekinshi aınalymyna shyǵa almady.</p>

Qazaqstandyq tennısshi alǵashqy aınalymda dúnıejúzilik reıtıngide 72-orynda turǵan 19 jastaǵy qytaılyq Tszıýnchen Shanmen synǵa tústi

Qarsylastar osyǵan deıin Indıan-Ýellste (AQSh) kezdesip, onda Býblık ońaı jeńgen edi — 6:4, 6:1.

Bul joly birinshi partııada esep 4:4 bolǵan mezette Shan breık jasap, sosyn óz geımin aldy — 6:4.

Ekinshi sette Býblık esep 4:3 bolǵanda, breıkke qol jetkizdi — 6:3.

Úshinshisinde qazaqstandyq tennısshi esep 5:4 bolyp, setke dop bergende óz múmkindigin paıdalana almady — 5:5. Degenmen taǵy bir breık jasap, kózdegenine jetti — 7:5. 

Tórtinshisinde qytaılyq sportshy 5:0 esebimen alǵa ketti. Býblık esepti qysqartqanymen, tarazy basyn teńestire almady — 3:6.

Sheshýshi, besinshi sette Shan breıkpen 3:2 esebimen alǵa shyqqanymen, Býblık sol boıda ese qaıyrdy — 3:3. Biraq Shan esepti qaıta 5:3-ke jetkizdi. Sodan keıin matchqa dop bergende, qatelesken joq — 6:4. 

Úsh saǵat 35 mınýtqa sozylǵan tartysty báseke barysynda Býblık 22 eıspen birge 11 breık-poınttyń beseýin paıdalandy. Shan 4 eıs, 6 breıkpen (15 breık-poınt) kózge tústi.

Tszıýnchen Shan kelesi aınalymǵa shyǵý úshin álemniń 55-raketkasy, ıspanııalyq Roberto Karbales-Baena nemese reıtıngide 276-satydaǵy ulybrıtanııalyq ıAn Hoınskıdiń qaı jeńgenimen talasady.

Taǵy bir qazaqstandyq, álemniń 61-raketkasy Aleksandr Shevchenko osy túnde reıtıngide 83-satydaǵy germanııalyq Domınık Kepfermen sheberlik baıqasady.

Eske sala keteıik, budan buryn tennısten AQSh ashyq chempıonaty bastalatynyn habarlaǵan bolatynbyz.

Sondaı-aq qazaqstandyq jas tennısshiler eki týrnırde jeńimpaz atandy.