Urpaq jalǵastyǵyn saqtaǵan otbasy

ASTANA. QazAqparat – Búginde áskerı qyzmetshiler arasynda kópbalaly otbasylar jeterlik. Osyndaı urpaq jalǵastyǵyn birinshi orynǵa qoıyp otyrǵan otbasylardyń biri – Erbol men Juldyz. Búgingi materıalymyz toǵyz bala tárbıelep otyrǵan otbasy jaıly bolmaq.

Shańyraqtyń ıesi, aǵa serjant Erbol Maqulbaev Aqtaý óńirlik garnızony Áskerı polıtsııa basqarmasynda bólimshe bastyǵy bolyp qyzmet atqarady. 1983 jyly 16 tamyzda Jambyl oblysy Baızaq aýdany Botamoınaq aýylynda kópbalaly otbasynda dúnıege kelgen. Ákesi Esenqul uzaq jyldar aýyl sharýashylyǵynda mehanık bolyp jumys istegen. Anasy Orynbasar úı sharýasynda bala tárbıesimen aınalysqan. Búginde ekeýi tórt balasynan birneshe nemere súıip otyrǵan baqytty ata-áje.

Erboldyń Nurbol, Erjan, Nurlan degen baýyrlary da Qazaqstan Qarýly kúshteri qatarynda qyzmet etip, Otan aldyndaǵy boryshyn ótegen.

Erbol 2000 jyly týǵan jerindegi Sverdlov atyndaǵy orta mektepti bitirip, Taraz qalasyndaǵy M.Dýlatı atyndaǵy Taraz memlekettik ýnıversıtetiniń «Ekonomıka jáne menedjment» fakýltetine oqýǵa túsedi. 2003 jyly ásker qataryna shaqyrylyp, Astana qalasyndaǵy 6636 áskerı bóliminde boryshyn ótedi. Áskerden soń oqýyn jalǵastyryp, 2006 jyly bitirip shyǵady.

2008 jyly 1 shildede Qarýly Kúshter qataryna kelisimshart boıynsha shaqyrylyp, Taraz óńirlik garnızonynyń Áskerı polıtsııa basqarmasynda eńbek jolyn bastaıdy. Sol jerde 11 jyl taban aýdarmaı qyzmet etti. 2019 jylǵy aqpan aıynda Aqtaý óńirlik garnızony Áskerı polıtsııa basqarmasy áskerı polıtsııa bóliminiń bólimshe bastyǵy – patrýl bastyǵy laýazymyna taǵaıyndaldy.

Ómirlik serigi Juldyz Álıasqarqyzy Jambyl oblysy Lýgovoı aýdanynyń týmasy. 1988 jyly 21 qańtarda «Jylqy zaýyty» aýylynda dúnıege kelgen. Ol da M.Dýlatı atyndaǵy Taraz memlekettik ýnıversıteti «Ekonomıka jáne menedjment» fakýltetiniń túlegi. Ekeýi ýnıversıtet qabyrǵasynda oqyp júrgende tanysyp, 2005 jyly naýryz aıynda shańyraq kótergen.

2006 jyly dúnıege kelgen tuńǵyshy Sezim búginde stýdent. Almatydaǵy «Symbat» dızaın kolledjinde oqıdy. Sezimniń sińlileriniń aldy Jámıla, Janerke, Uldana, Nazym, Nazerke – mektep oqýshylary. Kishkentaı Nazgúl, Narıman, Uljan ázirge úıde, anasynyń tárbıesinde.

Kópbalaly úıdiń balalary óte baýyrmal keledi degen uǵym bar. Apaly-sińlili baýyrlar únemi bir-birine qaraılasyp, anasyna kómektesip júredi.

Erbol men Juldyz bala tárbıesin udaıy nazarda ustaıdy. Olardyń sabaqtan bos ýaqytta paıdaly ispen aınalysýyn qadaǵalaıdy. Mektepte oqıtyn qyzdary túrli úıirmelerge qatysyp turady.

Áskerı salada, onyń ishinde áskerı polıtsııa basqarmasynda qyzmet atqarǵan soń Erbolǵa júkteler jaýapkershilik te salmaqty. Qyzmetiniń ózine unaıtynyn maqtanyshpen aıtady.

Áskerı polıtsııa qyzmetkerleri bólimshelerdiń, quramalar men áskerı qalashyqtardyń aýmaǵyndaǵy zańdylyq pen tártipti qamtamasyz etip qana qoımaı, sonymen qatar aýqymdy jattyǵýlar kezinde arnaıy tapsyrmalardy da oryndaıdy. Ondaıda aptalap úı kórmeı ketýi – zańdylyq. Otbasyndaǵylar oǵan áldeqashan úırengen, únemi qoldaý kórsetip keledi.

Erboldyń eńbegi basshylyq tarapynan da baǵalandy. Onyń osyndaı dárejege jetýine aıaýly jary Juldyz Álıasqarqyzynyń jáne qyzdarynyń septigi tıdi desek, artyq bolmas.