«Urpaǵyna uran bolǵan analar» atty kitap jaryq kórdi

NUR-SULTAN. QazAqparat - Jazýshy Shárbaný Beısenovanyń «Uly dala arýlary» degen serııa aıasynda «Urpaǵyna uran bolǵan analar» atty úshinshi kitap qalyń oqyrmanǵa jol tartty. Osyǵan deıin «Súıinbıke», «Bozoq arýy» atty týyndylary basylyp shyqqan edi, dep habarlaıdy QazAqparat tilshisi.

«Bul eńbekte tarıhymyzda esimi erekshe atalatyn aıaýly analarymyz ben arý qyzdarymyzdyń ultqa úlgi, urpaqqa ónege bolatyn taǵylymdary jáne eldik múdde jolyndaǵy ıgilikti isteri keńinen qamtylyp jazylǵan. Sonyń ishinde Bórte hanym, Qyzaı, Abaq, Qarqabat analarymyz týraly qundy derekter keltirilgen. Eldik isterge aralasyp, otbasynyń ǵana emes, tutas ulttyń uıytqysy bola bilgen Rábııa Sultan begim, Jaǵan bıke hanym, Bopaı hanym sııaqty tarıhı tulǵalarymyz da nazardan tys qalmaǵan», - dep jazdy QR Parlament Senatynyń tóraǵasy Máýlen Áshimbaev Facebook paraqshasyna.

Onyń aıtýynsha, aldaǵy ýaqytta bul baǵyttaǵy jumystar áli jalǵasady.

Óıtkeni mundaı týyndylar – ulttyń shejiresinen syr shertetin tarıh qana emes, jas býynǵa aıtar ósıeti mol qymbat qazyna.

«Jańa kitapty kópshilikke tanystyrý rásimi Qazaqstan Jazýshylar odaǵynyń Nur-Sultan qalalyq fılıalynda ótti. Sol jerde Tursyn Jurtbaı, Saýytbek Abdrahmanov, Janbolat Aýpbaev jáne basqa da qalamgerler sóz sóılep, eńbektiń aldaǵy jalǵasy jóninde óz usynystaryn bildirdi. Osy rette týyndynyń tusaýkeser rásimin uıymdastyrǵan Jazýshylar odaǵynyń elordalyq fılıalyna, onyń basshysy Dáýletkereı Kápuly baýyrymyzǵa, Álibek Asqarov aǵamyzǵa jáne osy eńbektiń jaryq kórýine atsalysqan barsha azamattarǵa alǵysymdy bildiremin. Asyl tekti ázız analarymyz jaıyndaǵy jańa kitaptyń oqyrmany kóp bolsyn», - dep jazdy Máýlen Áshimbaev.