Urlanǵan telefondar bazasy qurylady
«Qazir IMEI-kodtardy tirkeý erejelerin daıyndap jatyrmyz. Meniń oıymsha, aldaǵy eki-úsh aptada bul jumysty aıaqtaımyz. Sodan soń Qazaqstanda urlanǵan telefondardyń bazasy paıda bolady. Ol jerde IMEI-kodtar boıynsha ár nómirdiń kimdiki ekenin dálme-dál anyqtaýǵa bolady»,- dedi mınıstr.
Aıtpaqshy, buǵan deıin IMEI-kodtar bazasynda tirkelmegen uıaly telefondardy buǵattaý jóninde aıtylǵan edi. Alaıda, Dáýren Abaev buǵan eshqandaı da alańdaýdyń qajeti joqtyǵyn málim etti. «Qazir eshbir telefondardy buǵattamaımyz. Buǵan alańdaýdyń keregi joq. Bul jumysty halyqqa zııany tımeıtin etip júrgizemiz. Sebebi, bul jerde kúrdeli jaǵdaı qalyptasqan. Kezinde bir ǵana IMEI-kodtary bar 500 telefon ákelingen. Mysalǵa, solardyń bireýi urlanǵan telefon bolyp shyqty delik. Biz bir telefon úshin qalǵan 499 telefondy buǵattaı almaımyz ǵoı»,- dep túsindirdi ol.
Mınıstrdiń aıtýynsha, degenmen IMEI-kodtardy tirkeýdiń tıimdi jaqtary da bar. Óıtkeni, urlyqtardyń basym bóligin osy uıaly telefondar urlyǵy quraıdy. «Uıaly telefondar urlyǵynyń ishinde 80 paıyzy balalardyń qalta telefondaryn urlaýǵa jatady. Osylaısha, biz balalarǵa qarsy urlyqtyń sanyn kúrt azaıtýǵa úmittenip otyrmyz»,- dep túıindedi sózin Dáýren Abaev.
Aıta ketelik, uıaly telefondar urlyǵyn azaıtý úshin IMEI-kodtardy engizý tájirıbesin Avstralııa júzege asyrǵany málim. 2002 jyly avstralııalyq uıaly baılanys operatorlary urlanǵan telefon apparattarynyń IMEI-kodtarynyń tizimin jasap, olardy jelilerden buǵattap tastady. Sonyń nátıjesinde telefon urlyǵy kúrt azaıdy. Óıtkeni, jumys istemeıtin urlanǵan telefondar eshkimge kerek bolmaı qaldy. Alaıda, bul tájirıbeni kóptegen elder áli zertteý ústinde.
Uıaly telefondarǵa qatysty taǵy bir jaǵymdy jańalyq bar. Aqparat jáne kommýnıkatsııalar mınıstrligi «Uıaly baılanys sapasyna halyqtyq baqylaý» atty jańa qyzmet túrin iske qospaqshy. Mundaı qyzmet qazaqstandyqtarǵa qandaı da bir uıaly baılanys operatorynyń tarapynan týyndaǵan máseleler men aqaýlar jóninde aryz-shaǵymdaryn jiberýge jol ashady. Uıaly baılanys qyzmetin tutynýshylar aryz-shaǵymdaryn mınıstrliktiń saıtyna joldaıdy. Al mınıstr árbir qazaqstandyqtyń ótinishi men shaǵymyna qatysty tıisti is-sharalar qabyldanatynyna ýáde berdi.
«Osy qyzmet túri daıyn bolǵan kezde biz onyń tusaýyn kesip, halyqqa tanystyramyz. Sizder qandaı uıaly baılanys túriniń úıde jaqsy isteıtinin, qandaı operatordyń qyzmeti jumysta tıimdi ekenin kóre alasyzdar. Biz «mobıldi quldyq» degendi joıdyq. Sonyń bir dáleli, kez-kelgen adam basqa operatorǵa jedel aýysa alady. Sizder statıstıka boıynsha ózińizdiń operatoryńyz nashar jumys isteıtinine kóz jetkizseńiz, al úıde aǵańyzdyń nemese ápkeńizdiń telefonyndaǵy uıaly baılanys jaqsy ekenin kórseńiz, birden soǵan aýysa alasyz»,-dep túsindirdi Dáýren Abaev. Onyń aıtýynsha, atalǵan qyzmet túri 2017 jyldyń sońyna deıin iske qosylady.