Urlanǵan qarýlardyń áli tolyq tabylmaýy qańtar oqıǵasy tyńǵylyqty josparlanǵanyn kórsetedi – ІІM

NUR-SULTAN. QazAqparat – Urlanǵan qarýlardyń áli tolyq tabylmaýy qańtar oqıǵasy tyńǵylyqty josparlanǵanyn kórsetedi. Májilistiń jalpy otyrysynda depýttardyń suraqtaryna jaýap bergen QR Іshki ister mınıstri Marat Ahmetjanov osyndaı pikir bildirdi, dep habarlaıdy QazAqparat tilshisi.

Depýtat Irına Ýnjakova Іshki ister mınıstrinen qańtar oqıǵasy kezinde urlanǵan qarýdyń qalǵan bóligin tezdetip tabý úshin qandaı sharalar qabyldanyp jatqanyn surady.

«Shynymen de, búginde, ókinishke qaraı, 2000-nan astam qarý áli tabylǵan joq. Muny naqty aıtýymyz kerek. Men taǵy da azamattarymyzǵa qaıyrylǵym keledi. Іshki ister mınıstrligi zańǵa súıene otyryp, qarýdy óz erkimen tapsyrǵan adamdardy ákimshilik, qylmystyq isterge tartpaý týraly kepildik beredi. Osy 2000-nan astam atys qarýy tabylmaı jatqany, jasyrýly jatýy qańtar oqıǵasy aldyn ala josparlanǵanyn aıǵaqtaıdy. Árıne, ol qarýlar qazir bizdiń turǵyndarǵa shynymen qaýip tóndiredi. Sondyqtan Іshki ister mınıstrligi «Qarý» atty arnaıy operatsııa júrgizip jatyr. Oǵan jeke quramnyń 10 myń qyzmetkeri jumyldyrylǵan», - dedi mınıstr.

Aıtýynsha, bul baǵyttaǵy jumystar jedel tergeý baǵytynda ǵana emes, el arasynda túsindirý baǵytynda da júrip jatyr.

«Túsindirý jumystary jemisin berip jatqanyn aıtý kerek. Mysaly, Almaty oblysyndaǵy aýyldardyń birinde turǵyndar qarý satpaq bolǵan qylmyskerlerdi ózderi ustap, urlanǵan qaýlarymen birge polıtsııaǵa tapsyrdy. Qazir ol adamdar qamaýda. Olardyń basqa da birqatar qylmys jasaǵany belgili boldy», - dedi Marat Ahmetjanov.