Urlanǵan qarýdyń 2 myńnan astamy qylmyskerlerdiń qolynda – Bas prokýratýra
«Urlanǵan atys qarýlaryn anyqtaý jumystary belsendi júrgizilip jatyr. Shymkent qalasynda Ulttyq qaýipsizdik komıteti organdary Іshki ister mınıstrligimen birlesip, jedel-izdestirý is-sharalaryn júrgizdi. Osy oraıda Túrkistan oblysynyń 2 turǵyny ustaldy. Olardan «Kamerad» ańshylyq dúkeninen urlanǵan eki «Saıga-12» karabıni men pnevmatıkalyq myltyq tabyldy», - dedi Eldos Qılymjanov Ortalyq kommýnıkatsııalar qyzmetinde.
Sonymen qatar ol Tarazda qarý saqtalǵan «qoıma» tabylǵanyn aıtty. Odan Jambyl oblysy polıtsııa departamentinen urlanǵan 1 «Kalashnıkov» avtomaty, 2 «Makarov» tapanshasy, «SHTURM» shabýyl myltyǵy, 1 granata jáne oq-dáriler tárkilendi.
«Jalpy, el boıynsha quqyq qorǵaý organdary qańtar oqıǵalary kezeńinde urlanǵan 846 oıyq jáne tegis uńǵyly qarýdy tapty. Urlanǵan qarýdyń 2 myńnan astamy áli de qylmyskerlerdiń qolynda ekenin, bul óz kezeginde qaýip tóndiretinin atap ótken jón. Osy rette zańsyz saqtalǵan qarýdy, oq-dárilerdi jáne jarylǵysh zattardy óz erkimen tapsyrǵan adamdar qylmystyq jaýaptylyqtan bosatylady. Degenmen, olardyń áreketterinde ózge de qylmys quramy bolmaýy tıis. Al adamdy quqyq qorǵaý organdary qarýmen ustap alǵan jaǵdaılar erikti túrde tapsyrý dep tanylmaıdy», - dedi Bas prokýratýra ókili.
Budan buryn habarlanǵandaı, qazirgi kezde arnaıy prokýrorlardyń is júrgizýinde jappaı tártipsizdikter boıynsha 53 jáne terrorızm aktilerine qatysty 32 qylmystyq is bar .
Memlekettik obektilerdi órtteý, múlikterdi joıý jáne terrorızm aktileri Almaty, Shymkent qalalarynda, Aqtóbe, Atyraý, Almaty, Jambyl, Qyzylorda jáne Shyǵys Qazaqstan oblystarynda jasalǵany belgili boldy.
Foto: www.kirovsk.by