Úrker-2020: Otandyq jýrnalıstıka deńgeıi álemdik básekege qabiletti
Saltanatty jıyndy ashqan QR Aqparat jáne qoǵamdyq damý mınıstri Aıda Balaeva bul marapattyń Astana Media Week jobasy aıasynda jasalǵanyn atap ótti.
«Úsh kúnge sozylǵan Astana Media Week jobasy halyqaralyq jýrnalıstıkanyń nazaryn elordamyzǵa aýdarǵan erekshe is-shara boldy. Búginde búkil álemdi ábigerge salǵan pandemııa jaǵdaıynda álem jýrnalısteri bir arnada toǵysyp, óz kásipterine degen adaldyqty kezekti ret dáleldep otyr. Onlaın formattaǵy platformada álemniń 16 memleketiniń kórermenderi úshin 50-den astam halyqaralyq medıasarapshylar tájirıbelerin bólisti. Jáne eń bastysy – bizdiń otandyq jýrnalıstıka deńgeıi de álemdik básekege qabilettiligine kóz jetkizdik», - dedi mınıstr.
Qazaqstandyq platforma AQSh, Ulybrıtanııa, Shvetsııa, Saýd Arabııasy, RF sııaqty medıaalpaýyt memleketterdiń aqparat keńistigine shyǵyp, paıdaly kontentpen bólisti.
«Osyndaı ortaq alańǵa ózara tájirıbe almasyp, ozyq úlgilerdi úırený jýrnalıstıkanyń biliktiligin jetildirip, ony jańa deńgeıge kóteretini anyq. Sonyń ishinde otandyq medıa salasynda odan ári damýyna úlken serpin beredi dep senemiz. «Úrker» ulttyq báıgesiniń marapattaý rásimi Astana Media Week aptalyǵy aıasynda ótip otyr. Árıne, biz úshin qoǵamdaǵy ár salanyń ózindik orny bar. Sonyń ishinde jýrnalıstıkanyń qoǵam úshin atqaryp otyrǵan eńbegi óte zor. Árbir eńbek laıyqty baǵasyn alýy kerek dep sanaımyz. Bizdiń búgingi sharamyz da osy nıetpen ótkizilip otyr. Sondyqtan bizdiń ádil qazylar alqasy júzden júırik shyqqan shyn talanttarǵa laıyqty baǵasyn bergenine senimdimiz», - dedi A. Balaeva.
Sondaı-aq, mınıstr bıylǵy baıqaýdyń taǵy bir jańalyǵy – qazaq jýrnalıstıkasynyń jampozy Sherhan Murtahza atyna arnaıy nomınatsııa taǵaıyndalǵanyn eske saldy.
«Sherhan aǵamyzdyń otandyq jýrnalıstıkany damytýǵa atqarǵan eńbegi men qosqan úlesi ólsheýsiz. Sondyqtan da, qazaq jýrnalıstıkasynyń asqar shyńy sanalatyn Sheraǵa atyndaǵy marapatqa ıe bolý – kim-kim úshin de zor mártebe, bıik jetistik dep bilemin», - dedi Aıda Balaeva.
Atalǵan nomınatsııa boıynsha músinshe men 1 mıllıon teńge syıaqyny belgili jýrnalıst, pýblıtsıst Qaınar Oljaı jeńip aldy.