Judyryq ala júgiretinderdi qylmystyq jaýapqa tartý josparlanyp otyr – ІІM

<p>Elimizde adam densaýlyǵyna qasaqana jeńil zııan keltirýdi jáne uryp-soǵýdy qylmystyq jaýapkershilikke tartý josparlanyp otyr. Bul týraly ІІM ákimshilik polıtsııa komıteti tóraǵasynyń orynbasary Renat Zulhaıyrov málim etti, dep habarlaıdy<a href="https://kaz.inform.kz/" target="_blank" rel="noopener"> Kazinform.&nbsp;</a></p>

«2023 jylǵy 8 jeltoqsanda QR Prezıdentiniń Jarlyǵymen (№ 409) bekitilgen «Adam quqyqtary jáne zań ústemdigi salasyndaǵy is-qımyl» jospary bekitildi. Sonyń negizinde bala quqyqtary jónindegi ýákil Dınara Zákıeva jáne Parlament Májilisiniń depýtattarymen birlesip áıelder men balalardyń quqyqtaryn qorǵaý, sondaı-aq otbasylyq qundylyqtardy ilgeriletý jónindegi sharalardy kúsheıtý jóninde zańnamalyq túzetýler ázirlendi», — dedi Renat Zulhaıyrov ІІM-de ótken baspasóz máslıhatynda.

Onyń aıtýynsha, túzetýlerge sáıkes densaýlyqqa qasaqana jeńil zııan keltirýdi jáne uryp-soǵýdy qylmystyq jaýapkershilikke tartý josparlanyp otyr.

«Quqyq buzýshynyń minez-qulqyna, óz-ózin ustaýyna talaptar qoıylyp, qajet jaǵdaıda áleýmettik beıimdelý ortalyqtaryna jiberý qarastyrylyp jatyr. Sondaı-aq kúsh kórsetýshiniń psıhokorrektsııalyq kýrstardan ótýi qarastyrylǵan. Joǵaryda atalǵan talaptar qylmystyq kodeks sheńberinde belgilenedi», — deıdi mınıstrlik ókili.