Ýrbanıstıka basqarmasy almatylyqtarǵa halyq sanaǵy boıynsha úndeý jasady

ALMATY. QazAqparat - Halyq sanaǵy azamattardyń turǵyn úı jaǵdaıyn jaqsartý úshin mańyzdy. Bul týraly Almaty qalasy Josparlaý jáne ýrbanıstıka basqarmasynyń basshysy Almashan Ahmedjanov brıfıng barysynda aıtty, dep habarlaıdy QazAqparat tilshisi.

Spıkerdiń sózinshe, BUU-nyń halyq sanaǵyn jáne turǵyn úı qoryn júrgizý jónindegi Eýropalyq statıstıkter konferentsııasynyń usynymdaryna sáıkes «Halyq sanaǵy» el aýmaǵynda jáne onyń eń az geografııalyq birlikterinde turatyn halyq sanyn, búkil halyqtyń áleýmettik jáne demografııalyq sıpattamalaryn terý jónindegi aqparatpen qatar, turaqty ýaqyt aralyqtary arqyly resmı esepke alýdy júrgizýge múmkindik beretin is-shara retinde aıqyndalady.

«COVID-19 pandemııasyna baılanysty elimizde 2020 jylǵa josparlanǵan kezekti ulttyq halyq sanaǵyn ótkizý 2021 jylǵa aýystyryldy. QR Statıstıka agenttigi halyqtyń aldyńǵy sanaqtarynyń, áleýmettik-demografııalyq zertteýlerdiń qolda bar materıaldaryn jınady jáne zerttedi, demograf ǵalymdar men basqa da mamandardyń usynystary men eskertýlerin, osyndaı is-sharalardy ótkizý jónindegi halyqaralyq uıymdardyń usynymdary men tájirıbesin eskerdi», - deıdi ol.

Onyń aıtýynsha, júrgizilip jatqan sanaq eń senimdi aqparat kózi. Sebebi ol azamattardyń jeke saýalnamalaryna negizdelgen.

«Bul derekter 10 jyldaǵy halyqtyń demografııalyq jáne áleýmettik-ekonomıkalyq damýynda bolǵan ekonomıkalyq, demografııalyq jáne áleýmettik ózgeristerdiń kórsetkishi ekeni belgili. Oǵan jalpy el boıynsha, qalalyq jáne aýyldyq jerler boıynsha jáne óńirlik bóliniste jynysy men jasy, neke jaǵdaıy, ulttyq quramy, azamattyǵy, dinı senimi, bilim deńgeıi, tilderdi bilýi, úı sharýashylyqtarynyń sany men mólsheri, turǵyn úı jaǵdaılary jáne basqa da sapalyq jáne sandyq belgileri boıynsha halyq sanynyń qurylymyndaǵy ózgerister kiredi», - dedi Almashan Ahmedjanov.

Qorytyndylaı kele, ol halyq sanaǵy – bul Qazaqstannyń Ulttyq statıstıka júıesiniń quramdas jáne ajyramas bóligi, halyq pen onyń turǵyn úı jaǵdaılary týraly derekterdiń negizgi kózi ekenin eske saldy.

«Sanaq nátıjeleri úı sharýashylyq jaǵdaıyn, neke-otbasy qatynastaryn jaqsartýǵa, múmkindigi shekteýli adamdardyń ómirin, halyqtyń turǵyn úı jaǵdaılaryn jaqsartý jónindegi memlekettik baǵdarlamalardy ázirleý úshin, sondaı-aq bilim berý, jumyspen qamtý, týý jáne kóshi-qon máseleleri boıynsha sheshimder qabyldaý úshin qajet»,- deıdi spıker.

A. Ahmedjanov Almaty turǵyndaryn halyq sanaǵyn keıinge qaldyrmaýǵa jáne onlaın ótýge shaqyrdy.

Aıta ketsek, Ýrbanıstıka basqarmasynda, sondaı-aq «Almaty Bas jospary» ǴZI qyzmetkerleriniń 100%-y jańa formatta sanaqtan ótti.