Ýran eksporttaýdyń balama joldaryn izdeımiz – Energetıka mınıstri
17:32, 01 Aqpan 2023
ASTANA. QazAqparat – Geosaıası jaǵdaıdyń turaqsyzdyǵyna baılanysty Qazaqstan ýran tasymaldaýdyń balam joldaryn izdemekshi. Bul týraly Energetıka mınıstri Bolat Aqsholaqov vedomstvonyń keńeıtilgen alqa májilisinde aıtty, dep habarlaıdy QazAqparat tilshisi.
«2022 jyldyń qorytyndysy boıynsha ýran óndirý kólemi 21,3 myń tonna boldy. Turaqsyz geosaıası jaǵdaıdy eskere otyryp, 2023 jyly ýran ónimderin tasymaldaý baǵyttaryn ártaraptandyrý máselesi pysyqtalady», - dedi Bolat Aqsholaqov.
Sondaı-aq ol byltyr jeltoqsan aıynda Qytaıǵa jylý bólgish qurastyrmalardyń birinshi partııasy jetkizilgenin eske saldy.
«Bıyl «Jylý energetıkasy týraly» zań qabyldanady. Sapaly jóndeý naýqanyn qamtamasyz etý jáne ınvestıtsııalyq baǵdarlamalardyń oryndalýyn baqylaý salasynda Atomdyq jáne energetıkalyq qadaǵalaý komıtetiniń rólin kúsheıtý josparlanýda», - dedi mınıstr.