Ural Motorcycles ókilderi memlekettik organdarǵa eshqandaı usynys jasaǵan joq – SQO ákimdigi

PETROPAVL. QazAqparat – Soltústik Qazaqstan oblysynyń ákimdigi Ural Motorcycles kompanııasy ókilderiniń Petropavl qalasyna kelip, memlekettik organdarǵa júginbegenin aıtty, dep habarlaıdy QazAqparat.

Áleýmettik jelide Ural mototsıklderi óndirisiniń Petropavlǵa kóshiriletini týraly aqparat tarap jatyr. Buǵan autonews.ru saıtynyń materıaly negiz bolǵan. Jarııalanǵan aqparatqa sáıkes, Ural Motorcycles bul qadamyn sanktsııaǵa ushyraıtyn birqatar quramdas bólikterdiń jetispeýi jáne Reseıden tehnıka ákelýge tyıym salynǵanymen túsindirdi. Ural tehnıkasynyń basym bóligi Batys elderine eksporttalady.

Bas dırektor Ilıa Haıttyń aıtýynsha, óndiris ornynda jańa jumys oryndary ashylady. Basqarý komandasy Reseıden kóship keledi.

Oblys ákimdigi zaýyt ókilderiniń Petropavlǵa kelip, qurastyrý óndirisin ornalastyrý oryndaryn qarap, jalǵa berýshilermen kelissózder júrgizgenin atap ótti.

«Memlekettik organdarmen kezdesýler ótkizilgen joq. Memlekettik qoldaý sharalary áli qoldanylǵan joq. Aqparat jaqynda jańartylady. Jalpy, Soltústik Qazaqstan oblysy jańa óndirister ashýǵa ınvestorlardyń usynystaryn qaraýǵa árqashan daıyn. Sonyń ishinde «Qyzyljar» arnaıy ekonomıkalyq aımaǵynyń aýmaǵynda», - dep túsindirdi oblys ákiminiń baspasóz qyzmeti.