UOS ardagerleriniń máselelerin sheshýge arnalǵan jumystar qaıta qarastyrylady - Ardagerler uıymy

ASTANA. QazAqparat - Uly Otan soǵysy ardagerleriniń máselelerin sheshýge arnalǵan jumystar qaıta qarastyrylady. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngke Respýblıkalyq «Ardagerler uıymy» qoǵamdyq birlestigi Ortalyq keńesiniń tóraǵasy Ómirzaq Ozǵanbaev málim etti.

«Ótken jyldyń sońynda biz ardagerler arasynda zertteý júrgizdik. Osynyń aıasynda qart maıdangerlerge «ne qajet?» degen máseleni nazarǵa aldyq. Sonda ardagerlerdiń saýalnamasyna qatysqandardyń 25 paıyzy eshteńe qajet emes ekenin aıtty. Olar turmystary birshama jaqsy, balalarynyń qolynda jáne ulttyq dilimizde saı barǵa shúkirshilik etetin adamdar retinde osyndaı jaýap berdi», - dedi Ó. Ozǵanbaev.

Keńes tóraǵasynyń sózine qaraǵanda, saýalnamaǵa qatysqan adamdardyń úshten ekisi turmystyq máseleler, páter, baspanalaryn jóndeý, sondaı-aq medıtsınalyq kómek kórsetý máseleleri qajet ekenin jetkizgen.

«Mine, osy baǵytta qoǵamdyq uıymdar ókilderimen birlese jumystarymyzdy qaıtadan qurmaqshymyz. Búginde elimizde negizinen ardagerler pátermen tolyq qamtamasyz etilgen dep aıtýǵa bolady. Biraq ta, tolyq qanaǵattandyrylmaǵan endi 209 adam páter suraıdy. 400 adam ózderi turyp jatqan úılerine jóndeý jumystaryn júrgizýdi ótinip otyr. Bul sharalardyń barlyǵyn biz Uly Jeńistiń 70 jyldyǵyna deıin atqarýymyz kerek. Bul salada memleket tarapynan jaqsy úlgi kórsetilip otyr», - dedi Ó. Ozǵanbaev.

Aıta keteıik, 2015 jylǵy 1 qańtardaǵy málimetter boıynsha Qazaqstanda Uly Otan soǵysynyń 5083 ardageri turyp jatyr.