UOS ardagerlerine tegin keshendi medıtsınalyq qyzmet kórsetildi
18:18, 03 Mamyr 2013
ASTANA. 3 mamyr. QazAqparat - «Ulttyq ǵylymı kardıohırýrgııalyq ortalyǵy» AQ Uly Otan soǵysynyń ardagerleri men tyl eńbekkerlerine tegin keshendi medıtsınalyq qyzmet kórsetti. Bul týraly kompanııanyń baspasóz qyzmetine silteme jasaı otyryp, astana.kz saıty habarlaıdy.
2-3 mamyrda Ortalyqtyń jetekshi dáriger-kardıologtary Astana qalasynyń Esil aýdanynda turatyn Uly Otan soǵysy ardagerleri jáne tyl eńbekkerlerine arnap konsýltatsııa ótkizdi. Aktsııa aıasynda ardagerler júrek-qan tamyrlary aýrýlarynan keshendi túrde tekserýden ótti
«2-3 mamyrda Ulttyq ǵylymı kardıohırýrgııalyq ortalyǵy mamandary ár ardagerdiń úılerine baryp, olardyń keshegi Otan qorǵaý isinde kórsetken erlikteri men qaharmandyqtary úshin alǵys bildirip, atalǵan is-sharaǵa qatysý úshin shaqyrý berdi»,- delingen habarlamada.
Qarııalarǵa shara barysynda ortalyqtyń bilikti medıtsına qyzmetkerleri birge ilesip júrdi. Sonymen qatar, barlyq ardagerlerge eskertkish syılyqtar tabys etildi.