UOS ardagerlerine 181 myń teńgeden áleýmettik kómek kórsetiledi - Qyzylorda oblysy

QYZYLORDA. QazAqparat - Qyzylorda oblysynda 1941-1945 jyldary bolǵan Ekinshi dúnıejúzilik soǵystaǵy jeńistiń 72 jyldyǵyn merekeleýge daıyndyq jáne ony ótkizý jónindegi is-sharalar jospary bekitilip, jumystar bastalyp ketti. Bul týraly QazAqparat HAA tilshisi oblystyq jumyspen qamtýdy úılestirý jáne áleýmettik baǵdarlamalar basqarmasyna silteme jasap  habarlady.

Oblysta búginde 51 UOS ardageri men múgedegi jáne 5903 tyl eńbekkeri bar.

Jeńis merekesine oraı, UOS ardagerleri men tyl eńbekkerlerine materıaldyq jáne áleýmettik kómek kórsetýge oblystyq jáne jergilikti bıýdjetten 415,3 mln. teńge qarajat bólingen, onyń ishinde: Uly Otan soǵysy ardagerlerine - 181520 (80 AEK) teńgeden, soǵys jyldarynda janqııarlyq eńbegi men minsiz qyzmeti úshin KSRO ordenderi men medaldarymen nagradtalǵan adamdarǵa 113450 (50 AEK) teńgeden beriledi.

Uly Otan soǵysy jyldarynda keminde alty aı qyzmet etken azamattarǵa 68070 teńge (30 AEK) mólsherinde bir jolǵy áleýmettik kómek kórsetiledi.

Búgingi kúnge áleýmettik kómekterdi tóleý jumystary bastaldy, sáýir aıynyń sońyna deıin ardagerlerdiń jeke shotyna tolyǵymen aýdarylady.