UOS ardagerleri men múgedekteri TMD elderi aýmaǵynda poıyzdarda tegin júretin boldy

ASTANA. QazAqparat - «Qazaqstan temir joly» UK» aktsıonerlik qoǵamy Jeńistiń 70 jyldyq mereıtoıyna oraı 2015 jyldyń 1 mamyrynan 31 jeltoqsanyna deıin Uly Otan soǵysynyń ardagerleri men múgedekteri úshin jolaýshylar poıyzdarynda tegin jol júrý múmkindigin usynady.

«Merekelik shara aıasynda maıdangerler Táýelsiz Memleketter Dostastyǵy elderi aýmaǵynda temir jol kólikteriniń barlyq sanattary men baǵyttarynda (baratyn eldi mekenge deıin jáne keri qaraı) tegin júre alady. Atap aıtqanda, ardagerler qala mańy poıyzdarymen qatar «Tulpar-Talgo» poıyzdarynyń «Týrıst» vagondary men múmkindigi shekteýli adamdarǵa arnalǵan kýpelerde de tegin júredi», delingen «Jolaýshylar tasymaly» AQ baspasóz qyzmetiniń habarlamasynda.

TMD elderine saparlaý úshin bıletter Qazaqstan Respýblıkasy aýmaǵynda ornalasqan temir jol kassalarynda resimdeledi. Ol úshin ózimen birge jeke kýáligi, sonymen qatar UOS ardageri nemese múgedektigii týraly kýáliginiń túpnusqasy men kóshirmesi bolýy qajet.

Bul týraly qosymsha aqparatty «Jolaýshylar tasymaly» AQ-nyń temirjol kassalary men táýlik boıy jumys isteıtin «105» anyqtama telefonynan alýǵa bolady.