UOS ardageri B.Tabeshev: Biz balalarymyz ben nemerelerimizdiń bolashaǵy úshin shaıqastyq
«Soǵys ýaqyty - óte aýyr kezeń. Soǵystyń bastalǵany jóninde 16 jasqa tolmaǵan kezimde aýylda júrgende estigenmin. Kún saıyn jaýyngerlerimizdiń jetistikteri týraly jaqsy habar kútetinbiz. Jeńisti jaqyndatý úshin kóp eńbektendik. Maıdanǵa 1943 jyly Soltústik Qazaqstan oblysynan daıyndyqtan ótken soń attanǵan bolatynmyn. Shyndyqty aıtsam, kópshilik Otanymyzdy qorǵaý úshin maıdanǵa barýǵa talpyndy. Jeńis úshin janyn pıda etýge daıar edi. Men áýeli armııa generaly Pýhov bastaǵan 210 atqyshtar dıvızııasynyń 3-polk pýlemetchıgi bolǵanmyn. Keıin artıllerıst boldym. Urys alańynda kóptegen jaýynger joldastarymnan aıryldym. Osy jyly kúzde aýyr jaraqat alyp, gospıtalde biraz ýaqyt boldym. Sodan keıin maıdanǵa oralyp, armııa generaly Vatýtın basqarǵan 3-mehpolkte mınometshi boldym. Kıev túbindegi urysqa qatystym. 1943 jyly 6 qarashada Kıevti jaýdan azat ettik. Keıin Harkov úshin shaıqastyq. 1944 jyldyń qańtarynda alǵashqy «Jaýyngerlik qyzmeti úshin» medaline ıe boldym. Mınsk mańyndaǵy Kýrsk shaıqasyna qatystym. 1944-1945 jyldary armııa marshaly Konevtiń bastaýymen Chehoslovakııa men Polshany azat ettik. Jeńis kúnin Germanııada qarsy aldym. Ol kezde jasym jıyrmada edi. Soǵys aıaqtalǵannan keıin áskerı qyzmetimdi Ýkraına men Belorýssııada jalǵastyrdym. Halyq sharýashylyǵyn qalypyna keltirý jumystaryna qatystym. 1947 jyldyń aqpanynda Qazaqstanǵa oraldym. Soǵysqa deıin 7 synyptyq bilimim ǵana bolǵandyqtan, oqýymdy ári qaraı jalǵastyrdym. On jyldyq mektepti támamdap, JOO-ǵa tústim. Fızıka-matematıka jáne bıologııa mamandyqtary boıynsha joǵary bilim aldym. 50 jyl mektepte jumys istedim. Ómirimniń basym bóligin jastardy tárbıeleýge arnadym», - dedi ardager kartadan jaýyngerlik dańq oryndaryn jáne beıbit ómirde jazǵan kitaptaryn kórsetip.
«Ashyq aspan, beıbit ómir tilegim keledi. Keıingi urpaq biz kórgendi basynan keshirmesin. Bilim alyp Qazaqstannyń erteńi úshin aıanbaı eńbek etińder. Memleket basshysy anyq maqsat pen mindetterdi alǵa qoıdy. Sony oryndaý úshin qoldan kelgendi jasaý qajet. Bıyl, ádettegideı jaýynger dostardy kezdestirý úshin alańǵa baramyn. Jyl saıyn bizdiń qatarymyz sırep barady. Bul, árıne, qynjyltady. Alaıda, ásirese jastar, bizdi umytpaıdy. Oqýshylar qonaqqa shaqyryp, ózderi de hal-jaǵdaıymdy surastyrǵaly keledi. Olar baqytty bolsyn! Biz balalarymyz ben nemerelerimizdiń bolashaǵy úshin kúrestik qoı», - dep túıdi Barlybaı ata.