UOK mınıstr Muxamedıulyna dopıngke qarsy erejelerdi túsindirip berdi

ASTANA. QazAqparat - QR Mádenıet jáne sport mınıstri Arystanbek Muxamedıulynyń "Qazaqstanda dopıng paıdalanǵan sportshylarmen birge bapkerlerdi, dárigerlerdi, tipti soǵan jaýapty memlekettik organdy jazaǵa tartý sharasy zańdy túrde engiziledi" degen málimdemesinen keıin QR Ulttyq Olımpıada komıteti qazirgi dopıngke qarsy erejelerge túsinikteme berdi. Mınıstrlik kelesi jyldan bastap dopıng úshin qylmystyq jazany da engizýdi qarastyryp otyr. UOK málimetine sáıkes, ereje boıynsha sportshynyń aınalasyndaǵy mamandarǵa da sanktsııa salýǵa bolady. Alaıda Halyqaralyq Olımpıada komıteti dopıng úshin qylmystyq jazanyń engizilgenin qalamaıdy, dep xabarlaıdy QazAqparat tilshisi.

Búginde álem boıynsha sporttaǵy dopıngke qarsy kúres sharalarynyń barlyǵy Olımıada xartııasy, Búkilálemdik dopıngke qarsy kodeks pen dopıngpen kúres jónindegi Halyqaralyq konventsııa negizinde júrgiziledi. Sońǵy qujatqa Qazaqstan osydan jeti jyl buryn qosylǵan. Halyqaralyq Olımpıada komıteti bolsa, óz kezeginde árbir Olımpıada oıyndary kezinde dopıngke qarsy erejelerdi qabyldaıdy. Oıyndarǵa qatysatyn árbir sportshy, bapker men qyzmet kórsetýshi top atalǵan erejelerdi oryndaýǵa avtomatty túrde mindetteledi.

Budan bólek, dopıngke qarsy Búkilálemdik kodeks bar. Onda sportshylardyń synamalaryn 10 jyldyń ishinde qaıta tekserý sharalary qarastyrylǵan. Oǵan deıin barlyq synamalar Shveıtsarııanyń Lozanna qalasyndaǵy dopıng-zertxanasynda saqtalady. Dopıngke qarsy Búkilálemdik kodeks alǵash ret 2003 jyly qabyldanyp, 2004 jyly Afınada ótken Olımpıada oıyndary kezinde kúshine engen bolatyn. Sodan beri atalǵan qujatty eki ret ózgertti. Sońǵy nusqasy úsh jyl buryn bekitilip, ótken jyly kúshine engen. Dál sol qujattyń redaktsııasyna sáıkes, dopıng paıdalaǵany úshin sportshy ǵana emes, onyń aınalasyndaǵy adamadar - bapker, texnıkalyq personal, medıkter jáne taǵy basqa sportshyǵa qyzmet kórsetetin mamandar jaýapty dep sanalady.

"Qazaqstannyń "Sport jáne deneshynyqtyrý mádenıeti týraly" zańynda da sportshymen qatar onyń aınalasyndaǵy adamdardyń jaýapkershiligi qarastyrylǵan. Osy zańda "sportshynyń dıskvalıfıkatsııasy" degen uǵymnan bólek "sporttyq dáriger men bapkerdiń dıskvalıfıkatsııasy" atty shara, ıaǵnı adamdy kásibı qyzmetinen shettetý de bar. Al Olımpıada oıyndaryna keler bolsaq, dopıng erejelerin buzǵan sportshylar men basqa da adamdarǵa qatysty sanktsııa aldymen Halyqaralyq Olımpıada komıteti bastamasymen qolǵa alynady. Sonymen qatar naqty bir sport túrine jaýap beretin Halyqaralyq federatsııa qosymsha sanktsııalaryn engize alady. Osy oraıda sportshylardyń dopıng paıdalanýyna sebep bolǵan jáne ony jasyrǵan azamattar sportshyǵa qatysty jazadan da qatty qýdalanady. Alaıda VADA-nyń ózi dopıng úshin qylmystyq jazany engizýge úzildi-kesildi qarsy", - delingen resmı xabarlamada.

VADA kodeksi boıynsha qandaı da bir sportshy dopıngpen ustalǵan jaǵdaıda árbir memlekettiń dopıngke qarsy ulttyq uıymdary sol sportshyǵa qyzmet kórsetetinderge qatysty tártiptik jazany qoldana alady. Qazaqstanda dopıngke qarsy uıymnyń qyzmetin "Dopıngke qarsy ulttyq ortalyq" RMQK-sy atqarady. Ereje buzylsa, tártiptik komıssııa qurylady. Onyń quramyna bes adam kiredi. Olar - QR Mádenıet jáne sport mınıstrliginiń Deneshynyqtyrý jáne sport isteri jónindegi komıtetiniń múshesi, dopıngke qarsy zertxananyń ókili jáne sporttyq mansabyn aıaqtaǵan úsh sportshy. Komıssııa tóraǵasy mindetin komıtet múshesi atqarady. Qazaqstan Respýblıkasynyń dopıngke qarsy erejelerine sáıkes, sol komıssııanyń sheshimi negizinde sportshy, bapkerler men basqa da mamandarǵa qatysty tártiptik jaza qoldanylady.

Degenmen, QR Ulttyq Olımpıada komıtetiniń málimetine sáıkes, "búginde Qazaqstannyń dopıngke qarsy júıesin xalyqaralyq talaptar saı etip jasaqtaý jumystary atqarylyp jatyr". Sonyń negizinde dopıngke qarsy erejelerge ózgerister engiziledi degen jospar bar.