Ýnıversıtetterdiń janynan Karera ortalyqtary ashylady - vıtse-premer

NUR-SULTAN. QazAqparat – Ýnıversıtetterdiń janynan Karera ortalyqtary ashylady. Bul týraly Halyqtyń tabysyn arttyrý baǵdarlamasyn tanystyrǵan QR Premer-Mınıstriniń orynbasary Eraly Toǵjanov aıtty, dep habarlaıdy QazAqparat tilshisi.

«Baǵdarlamadaǵy eń úlken baǵyttarymyzdyń biri - jastar. Jastarǵa qatysty naqty jobalar bar. 160 myń jas «Jastar praktıkasy», «Alǵashqy jumys orny» jobalarymen, 400 aılyq eseptik kórsetkish kóleminde granttarmen qamtylatyn bolady. Jumys isteımin degen jastarǵa úlken múmkindik bolaryna esh kúmánim joq», - dedi Úkimet basshysynyń orynbasary Ortalyq kommýnıkatsııalar qyzmetindegi baspasóz máslıhatynda.

Onyń atap ótýinshe, elimizde 700-ge jýyq kolledj bar. Osy kolledjder janynan stýdentterge tájirıbe jınaqtaýǵa múmkindik beretin 100 shaǵyn kásiporyn ashylady.

Sonymen qatar 103 Karera ortalyǵy qurylady. Bul birinshi ret engizilip otyr. Búginde birde bir joǵary oqý ornynda mundaı ortalyq joq. Endi oqytyp, qolyna dıplom berip, qaı jerge jumysqa baratynyn anyqtamaı naqty jastardyń jumysqa ornalasýyna osy Karera ortalyqtary kómektedi», - dedi Eraly Toǵjanov.