Ýnıversıtetterdiń akademııalyq derbestigin nyǵaıtý saıasaty jalǵasady

ASTANA. QazAqparat – Bıznes jáne ındýstrııa ókilderimen tyǵyz baılanysta ǵylymı jobalar ázirleý qarastyrylyp otyr. Bul týraly Úkimet otyrysynda elimizdegi bilim berýdi damytýdyń 2026 jylǵa deıingi tujyrymdamasyn talqylaý kezinde QR Ǵylym jáne joǵary bilim mınıstri Saıasat Nurbek aıtty, dep habarlaıdy QazAqparat tilshisi.

«Kadr daıarlaýda aldyn ala boljaý modeline kóshýge toqtalsaq, bul forsaıttyq-boljaý negizinde óńir men ekonomıka salalaryna qajetti jańa kásipterge suranys pen kadr daıarlaý júıesin tıimdi ushtastyrý bolyp otyr. Osy rette memleket pen bıznestiń, ýnıversıtetterdiń kúsh-jigeri biriktiriledi», - dedi S. Nurbek.

Sonymen qatar ol «Jańa mamandyqtar atlasy» jasalǵanyn eske saldy.

«Osy rette óńirlik standarttar ázirlenetin bolady. Bul Halyqtyń tabysyn arttyrýdyń 2025 jylǵa deıingi baǵdarlamasyna engen «Mamandyǵym–bolashaǵym» jobasyn júzege asyrýǵa múmkindik beredi. Bul turǵyda tıimdi kásibı baǵdardy júrgizýde, kadrlardy daıarlaýda aldyn ala boljaý modelin damytýǵa múmkindik beredi», - dedi mınıstr.

Munymen qosa ol joǵary jáne joǵary oqý ornynan keıingi bilim berýdiń mazmunyn jańartý men básekege qabilettiligin arttyrý máselesine toqtaldy.

«Ýnıversıtetterdiń akademııalyq derbestigin arttyrý saıasaty jalǵasady. Jahandyq bilim berý baǵdarlamalary ázirlenetin bolady. Bıznes jáne ındýstrııa ókilderimen tyǵyz baılanysta ǵylymı jobalar ázirleý josparlanǵan. Óńirlik deńgeıdegi quzyret ortalyqtaryn qurý jumysy jalǵasady», - dedi vedomstvo basshysy.