Ýnıversıtetter janynan Karerlik ortalyqtar qurylady
«Prezıdent Qasym-Jomart Kemeluly Toqaev azamattardyń ál-aýqaty men áleýmettik jaǵdaıy memlekettiń basty nazarynda bolýy kerek ekenin atap kórsetti. Búgin usynylǵan Halyqtyń tabysyn arttyrý baǵdarlamasy azamattardyń turmysyn jaqsartý jáne áleýmettik-eńbek salasynda tásilderdi jańalaý úshin ázirlendi. Qujat birinshi kezekte, halyqtyń naqty tabysyn arttyrýǵa jáne jumyspen qamtýǵa baǵyttalyp otyr. Ol júıeli ındýstrııalandyrý, ekonomıkany ártaraptandyrý jáne kásipkerlikti damytý arqyly iske asyrylady», - dedi Álıhan Smaıylov búgin Úkimet otyrysynda.
Onyń atap ótýinshe, jańa jumys oryndaryn óndiristik klaster qurý, shaǵyn jáne orta bıznes salasyn qarjylaı qoldaý, iri kásiporyndar janynan shaǵyn kásipkerliktiń damýyna jaǵdaı jasaý arqyly ulǵaıtý josparlanyp otyr.
«Jeke úı sharýashylyqtaryn damytý, ınvestıtsııalyq jobalardy iske asyrý, mıkrokredıt berý aýyl turǵyndaryn jumyspen qamtyp, tabysyn arttyrýǵa yqpal etetin bolady. Ekonomıkanyń barlyq salasynda jumyspen qamtýǵa jáne jumysshy jastardy qoldaýǵa basymdyq beriledi. Oqý bitiretin túlekterdi jumysqa ornalastyrý úshin ýnıversıtetter janynan Karerlik ortalyqtar qurylady, al bos júrgen jastardy jumysqa tartý naqty sharalar arqyly iske asyrylady», - dedi Úkimet basshysy.
Sonymen qatar ol bıýdjet qyzmetkerleriniń, sonyń ishinde dárigerler men kishi medıtsınalyq personaldyń, pedagogterdiń jalaqysyn arttyrý kózdelgenin aıtty.
«Buǵan qosa eńbek tabysynyń aıyrmashylyǵyn qysqartýǵa jáne halyqtyń satyp alý qabiletin arttyrýǵa kóńil bólinedi. Qazirgideı ekonomıkalyq jaǵdaıda bul – kúrdeli másele, alaıda ony sheshý úshin belsendi jumys isteýimiz kerek», - dedi Premer-Mınıstr.