Ýnıversıtet túlekteri qandaı memlekettik qyzmetke irikteýsiz ornalasa alady

ASTANA. QazAqparat – Memlekettik grantpen oqý oryndaryn úzdik aıaqtaǵan túlekter aýdan men aýyldardaǵy tómengi laýazymdarǵa konkýrstyq irikteýsiz tikeleı taǵaıyndalady. Ortalyq kommýnıkatsııalar qyzmetinde ótken brıfıngide Memlekettik qyzmet isteri agenttigi tóraǵasynyń orynbasary Azamat Jolmanov osylaı málim etti, dep habarlaıdy QazAqparat tilshisi.

«Memlekettik grantpen qazaqstandyq oqý oryndaryn úzdik aıaqtaǵan túlekter aýdan men aýyldardaǵy tómengi laýazymdarǵa konkýrstyq irikteýsiz tikeleı taǵaıyndalady. Olar aýdan nemese oblystyq mańyzy bar qala ákimi jáne máslıhat apparattarynyń tómengi laýazymyna, jergilikti bıýdjetten qarjylandyrylatyn atqarýshy organnyń basshysy emes laýazymyna taǵaıyndala alady. Sonymen qosa, olar aýdandyq mańyzy bar qala, aýyl, kent, aýyldyq okrýg ákimi apparatynyń basshysynan basqa qyzmetterge, ortalyq memlekettik organnyń aýmaqtyq bólimshesiniń jáne oblystyq mańyzy bar qaladaǵy basshylyq etpeıtin memlekettik ákimshilik laýazymdarǵa ornalasa alady», - dep toqtaldy ol.

Azamat Jolmanovtyń aıtýynsha, bul bilikti jastardy memlekettik qyzmetke yntalandyrýǵa, jas mamandardy aýdan men aýyldyq aımaqtarǵa tartýǵa, óńirlerdegi kadr tapshylyǵyn azaıtýǵa yqpal etpek.