Ýnıversıtet rektorlary jyl saıyn halyq aldynda esep berýge tıis

NUR-SULTAN. QazAqparat – Ýnıversıtet rektorlary jyl saıyn halyq aldynda esep berýge tıis. Bul jaıynda Bilim jáne ǵylym mınıstri kezindegi qyzmeti týraly esep bergen Oqý-aǵartý mınıstri Ashat Aımaǵambetov aıtty, dep habarlaıdy QazAqparat tilshisi.

«Joǵary oqý oryndary kommertsııalyq emes aktsıonerlik qoǵam formasyna kóshirildi. Bul túsken tabysty memlekettik bıýdjetke jibermeı, ýnıversıtetti damytý úshin baǵyttaýǵa múmkindik beredi. Korporatıvtik basqarý – ýnıversıtetterdi damytýdyń óte perspektıvaly quraly. Árıne, bul reforma barlyq rektordyń kóńilinen shyqty dep aıtý qıyn, óıtkeni endi ýnıversıtet bıýdjetin tek rektor bir ózi ǵana baqylap, basqara almaıdy», - dep jazdy mınıstr Facebook paraqshasynda.

Onyń atap ótýinshe, Dırektorlar keńesi men JOO basqarmalary rektor óz pozıtsııasyn qorǵaı alatyn alqaly organdar retinde áreket etedi.

Dırektorlar keńesine azamattyq qoǵam ókilderiniń kóptep tartylǵany da óte mańyzdy.

«Endi ulttyq joǵary oqý oryndary ǵana emes, barlyq ýnıversıtettiń rektorlary jyl saıyn qol jetkizgen akademııalyq kórsetkishter jaıynda ǵana emes, bıýdjettiń atqarylýy týraly da halyq aldynda esep berýge tıis», - dedi Ashat Aımaǵambetov.