Ýnıversıadanyń bastalýyna 100 kún: Nurlan Abdýllın men Loren sport sharasynyń ánuranyn oryndady

ALMATY. QazAqparat - Búgin Almatyda Balýan Sholaq atyndaǵy sport jáne mádenıet saraıy aldynda 2017 jylǵy 28-shi qysqy Dúnıejúzilik Ýnıversıadanyń bastalýyna 100 kún qalǵany atalyp ótilip, sport sharasynyń basty ánurany tanystyryldy, dep habarlady «QazAqparat» tilshisi.

Mýzykalyq kompozıtsııanyń avtory, qazaqstandyq sazger, «Zolotoı Grammofon» syılyǵynyń úsh dúrkin jeńimpazy - Islam Raqymjanov.
Kompozıtsııany búgin halyq aldynda alǵash ret qazaqstandyq ánshiler: Nurlan Abdýllın men Loren jáne kompozııatsııa avtory oryndady.
«100 naqty qadam» Ult jorsparynyń 88-qadamyn júzege asyrý aıasynda atalǵan sharany ótkizý Jalpyǵa birdeı eńbek Qoǵamy ıdeıasyn nasıhattaýǵa baǵyttalǵan. Osylaısha, Ýnıversıada-2017 qatysatyn jáne joǵary nátıje kórsetetin qazaqstandyq sportshylar, óz tabystarymen elimizdi sporttaǵy jańa halyqaralyq deńgeıge alyp shyǵady.
Eske sala keteıik, búkilálemdik qysqy Ýnıversıada 2017 jyly 29 qańtar men 8 aqpan aralyǵynda Almaty qalasynda ótedi. Qazirgi tańda 58 memleket jarysqa qatysatynyn rastady. Ýnıversıadada sporttyń 12 túri boıynsha 86 medaldar jıyntyǵy utysqa salynady.
Sondaı-aq, jarystar 8 sporttyq nysanda: «Almaty Arena» jáne «Halyq Arenadan» bólek, «Shymbulaq», «Medeý», «Suńqar» tramplıni, B. Sholaq atyndaǵy Sport saraıy, «Alataý» shańǵy-bıatlon stadıony jáne Almaty oblysyndaǵy «Tabaǵan» kesheninde ótedi.  
Eske sala ketsek, Qazaqstan Prezıdenti Nursultan Nazarbaev Almatyda ótetin Ýnıversıadaǵa úlken kóńil bóledi. 2016 jyly 26 tamyzda Olımpıada oıyndarynyń chempıondary men júldegerlerin marapattaý kezinde Memleket basshysy bylaı dedi: «Bizdiń elimiz iri halyqaralyq jarystar ótkizetin alańǵa aınaldy. Kelesi jyly qańtar aıynyń sońynda bastalatyn stýdenttik sporttyń saltanatty sharasyna - Almatyda ótetin qysqy Ýnıversıada 2017 oıyndaryna daıyndyq jumystary óz máresine jetti.
Qazir daıyndyq sharalaryn sapaly deńgeıde aıaqtaý mańyzdy».

Prezıdent jas sportshylar úshin bul Ýnıversıada 2018 jyly Koreıanyń Phenchhan qalasynda ótetin XXIII qysqy Olımpıada oıyndaryna barar jolda mańyzdy kezeń bolatynyn atap ótti.

«Men aldaǵy Dúnıejúzilik oıyndarda qysqy sport túrlerinen qatysatyn qazaqstandyq sportshylar Rıo-de-Janeıro Olımpıadasynyń jeńis sherýin jalǵastyratynyna senimdimin», - dedi Prezıdent.