Ýnıversıadada jaraqat alǵan sportshy aýrýhanaǵa tikushaqpen jetkiziledi

ASTANA. QazAqparat - 28-shi Búkilálemdik qysqy Ýnıversıada kezinde jedel medıtsınalyq kómek kórsetetin dárigerler aǵylshyn tilin jetik biledi. Bul týraly búgin QR Úkimetiniń selektorlyq rejimdegi otyrysynda elimizdiń Densaýlyq saqtaý jáne áleýmettik damý mınıstri Tamara Dúısenova málim etti, dep habarlaıdy QazAqparat.

«Ýnıversıadany ótkizý aıasynda mınıstrlik Almaty qalasynyń ákimshiligimen birlesip, qatysýshylarǵa shara barysynda jáne toqtaǵan ornynda ýaqytynda jáne sapaly medıtsınalyq kómek kórsetý máselesin pysyqtady. Jalpy medıtsınalyq kómek kórsetý statsıonarlyq túrde, jedel járdem túrinde kórsetiledi. Sonymen qatar medıtsınalyq pýnkt qyzmetteri uıymdastyrylady. Búgingi tańda qajetti daıarlyq tolyq aıaqtaldy desek bolady»,- dedi mınıstr.

Dúısenovanyń aıtýynsha, qajetti medıtsınalyq qural-jabdyqpen jáne dári-dármekpen qamtamasyz etilgen kezekshi jedel medıtsınalyq kómek brıgadasy barlyq 9 sport nysanynda da jumys isteıtin bolady. 215 jedel járdem kóligi shuǵyl, dereý jáne qajetti medıtsınalyq kómek kórsetýge daıyn turady. Munan bólek, 40 sanıtarlyq avtokólik sporttyq jáne sporttyq emes nysandarda kezekshilik jasaıdy.

«№4 jáne №7 qalalyq klınıkalyq aýrýhanalardyń bazasynda tikushaq qonatyn alańdar salyndy. Bul qajet bolǵan jaǵdaıda patsıentti der ýaqytynda jetkizip, arnaıy mamandandyrylǵan kómek kórsetýge septigin tıgizedi. 149 medıtsına qyzmetkeri, onyń ishinde Germanııa mamandary tartylǵan bazada oqytylǵan quqarý qyzmetiniń 11 dárigeri jumys isteıdi. Jedel medıtsınalyq kómekke jumyldyrylǵan mamandardyń barlyǵy da aǵylshyn tilin bilin biledi», - dedi ol.