Ýnıversıada: Qazaqstandyq bıatlonshylar bir altyn, bir qola aldy

ASTANA. QazAqparat - Qazaqstandyq bıatlonshy Bekentaı Turlybekov AQSh-tyń Leık-Plesıd qalasynda ótip jatqan Qysqy Ýnıversıadada 10 shaqyrymǵa sprınt jarysynda chempıon atandy, dep habarlaıdy QazAqparat tilshisi.

Jarys barysynda ol eki atys syzyǵynda birde-bir oqty bos jibergen joq. Nátıje kórsetken ýaqyty- 27:51,5. Osylaısha qazaqstandyq bıatlonshy el quramasyna úshinshi altyndy saldy.

Atalǵan jarysta ekinshi oryn Born Ýesterveltke buıyrsa, úzdik úshtikti qazaqstandyq taǵy bir bıatlonshy Aleksandr Mýhın enshiledi.

Nátıjesinde atalǵan saıysta el quramasy bir altyn, bir qola medal aldy.

Eske salsaq, buǵan deıin bıatlonshy Vadım Kýrales pen shańǵymen sekirý sportynan Danıl Vasılev chempıon atandy.

Osylaısha medaldar kestesinde qazaqstandyq sportshylar 3 altyn, 1 qola júldemen úshinshi orynǵa kóterildi. Alda Japonııa jáne Fınlıandııa quramalary keledi.