Ýnıversıada dırektsııasy marqum Rafıkovtyń otbasyna 1 mln teńge ótemaqy beredi
Ýnıversıada Dırektsııasynyń ujymy ómirden qaıtqan áriptesin búgin bir mınýt únsizdikpen eske aldy.
«Keshe, 2017 jyldyń 31 qańtarynda saǵat 21:00 shamasynda «Suńqar» HShTK-de Ýnıversıada-2017 Dırektsııasynyń shtattaǵy qyzmetkeri 1983 jylǵy Baýyrjan Rafıkov qaıtys boldy. Jumys kúniniń aıaǵynda Baýyrjan Rafıkov kenet esten tanyp qaldy. Qasynda bolǵan áriptesteri onyń esin jıǵyzýǵa tyrysyp, nysanda kezekshilikte bolǵan medıtsınalyq qyzmetkerdi shaqyrtty, ol dereý alǵashqy medıtsınalyq kómekti kórsetti. Jedel járdem brıgadasy birneshe mınýttan soń oqıǵa ornyna jetti», - dep habarlaǵan bolatyn Ýnıversıada-2017 dırektsııasynyń baspasóz qyzmeti.
Alaıda, dárigerler 40 mınýt boıy Baýyrjannyń ómiri úshin kúreskenimen, ol qaıtys boldy.
«Búgin, 1 aqpanda Ýnıversıada-2017 Dırektsııasynyń ujymy marqum áriptesin bir mınýt únsizdikpen eske aldy. Artynda qart anasyn, jary men eki balasyn qaldyrǵan Baýyrjan Rafıkovtyń týystary men jaqyndaryna Ýnıversıada Dırektsııasy qaıǵaryp, kóńil aıtady. Baýyrjan Rafıkovtyń otbasysyna 1 mln teńge mólsherinde ótemaqy tólenedi», - dep habarlanǵan aqparatta.