Ýnıversıada aıaqtalǵan soń 1,7 myńnan asa otbasy jaıly baspanaǵa ıe bolady
Osyǵan deıin qalanyń shyraısyz sheti sanalyp kelgen Alataý aýdany búginderi qala qonaqtary men turǵyndaryn ózine tartyp otyrǵan jańa ortalyqqa aınalyp otyr. Osynda Ýnıversıada bas nysandary - «Almaty Arena» jáne Atletter aýyly ornalasqan. «Almaty Arenaǵa» qolsozym jerde 15,6 myń páterlik shaǵyn aýdan, sonyń ishinde, «Eski úıler» baǵdarlamasy boıynsha 9 qabatty eki úı boı kótergen. Aldaǵy 3 jylda taǵy 16 myń páterden turatyn 279 úı salynbaq.
Qysqy oıyndar ótkizilgen soń, tolyqqandy áleýmettik ınfraqurylymy bar Atletter aýyly 1,7 myńnan asa otbasy úshin jaıly baspanaǵa aınalady. Atletter aýylynyń 1748 páteri ary qaraı satyp alý múmkindigimen jaldaýǵa beriledi, osylaısha alǵashqy 8 jyl ishinde 15,5 mlrd. teńge mólsherinde ınvestıtsııalardyń 40%-y qaıtarylmaq. Bul Almatydaǵy baspanaǵa kezekti 10%-ǵa azaıtýy tıis.
Jańa turǵyn úı kesheninde emhana, sýpermarket, bank bólimsheleri men pochta, polıtsııa beketi qyzmet jasaıtyn bolady.
Ýnıversıada nysandary aınalasynda jańa mádenı ortalyq qalyptasýda. Qalamyzdyń mádenı jáne sáýlettik kórnekti oryndarynyń birine aınalatyn 7000 adamdy syıdyra alatyn meshit salynady dep josparlanyp otyr. Bolashaq turǵyndar men qala qonaqtary úshin qazaq taǵamdaryn daıyndaıtyn meıramhana, ulttyq aspaptar mýltımedıalyq murajaıy, «Alataý» dástúrli óner teatry, qolónershilerdiń kádesyılaryn satý ortalyǵy óz jumystaryn jalǵastyrady.Atletter aýylynda 100-ge jýyq qolóner sheberine arnap ortalyq qurylady. Oıyndar aıaqtalǵan soń, Alataý aýdanynyń kásiporyndary zamanaýı jaıly keńselerge jaıǵasýǵa múmkindik alady. Keńselerdi jaldaý quny qala ishindegi baǵadan 2 esege arzanyraq bolmaq.