Ýnıversıada alaýynyń estafetasyna 60 astanalyq qatysady

ASTANA. QazAqparat - Elordada 28-shi Dúnıejúzilik  Qysqy Ýnıversıadaǵa qyzý daıyndyq júrip jatyr. Qala ákimdigi bul sharany ótkizýdiń keshendi josparyn ázirledi.  Bekitilgen jospar boıynsha alaý estafetasy Nazarbaev Ýnıversıtetinde bastaý alyp, qalalyq ákimdik mańyndaǵy alańda aıaqtalmaq.

Astana ákimdiginen habarlaǵandaı, estafeta 2 kezeńge bólingen. Ol Qabanbaı batyr dańǵyly - Dostyq kóshesi - Qonaev kóshesi - Baraev kóshesi - Respýblıka dańǵyly- Kenesary kóshesi syndy qalanyń ortalyq kóshelerimen ótedi. Alaý estafetasynyń jalpy uzyndyǵy - 12 shaqyrym. 

Alaýdy úzdik, belsendi stýdentter men 28 jasqa deıingi astanalyq sportshylar, barlyǵy 60 adam alyp ótpek. Astanalyq ІІD jergilikti polıtsııa qyzmetiniń 1500 tártip saqshysy qoǵamdyq tártipti qamtamasyz etedi.

«Keptelisterdiń aldyn alý úshin joldar kezek-kezek jáne júrý jolaǵy boıynsha ǵana jabylatyn bolady. Qalanyń ǵana emes, barsha eldiń ımıdjdik saıasatyn nyǵaıtatyn shara óte aýqymdy ári áserli bolmaq», - dedi Astana qalasynyń dene shynyqtyrý jáne sport basqarmasy basshysynyń orynbasary Samat Qabdýllın brıfıng barysynda.

Birinshi kezeń aıaqtalysymen «Báıterek» monýmentiniń aldynda turǵyndar men qala qonaqtaryna arnalǵan kontserttik baǵdarlama usynylady.

Ekinshi kezeńde alaý respýblıkalyq shtab ókilderine tabystalyp, 2017 jylǵy 28-shi Dúnıejúzilik Ýnıversıadanyń ashylý saltanatyna qatysý úshin Astana-Almaty áýe reısimen ońtústik astanaǵa jetkiziledi.

Almatydaǵy Qysqy Ýnıversıadada 59 eldiń 2000 -ǵa jýyq sportshysy 12 sport túri boıynsha 86 júldeni ortaǵa salmaq. 

Astana atynan short-trek, shańǵy jarysynyń sportshylary men «Barys» hokkeı komandasy synǵa túsedi.