UNICEF-pen birlesken joba: Elordada balalar múddesin qorǵaıtyn zerthana ashyldy
«Social Innovation» jobasynyń basty maqsaty – qazaqstandyq balalardyń múddesin qorǵaıtyn áleýmettik jobalardy qoldaý men damytý.
«Zerthananyń ashylýy – áleýmettik ınnovatsııalardy damytýdaǵy eń durys qadamdardyń biri. Az ǵana ýaqytta biz áleýmettik baǵyttaǵy jobalardy júzege asyryp úlgerdik. ıÝNISEF-pen birlesken jumys arqyly bul jobalar óz múmkindikterin jaqsartyp, óz aıasyn keńeıte alady», - dedi Astana Hub tehnoparkiniń atqarýshy dırektory Ádilet Nurǵojın.
UNICEF-tiń Qazaqstandaǵy ókili Artýr van Dızenniń aıtýynsha, zamanaýı tehnologııalar arqyly balalardy túrli syn-qaterden qorǵaıtyn jobalardy júzege asyrýǵa bolady.
«Qazirgi zaman jyldam ózgerip jatyr jáne balalarǵa tónip turǵan syn-qater kóp. Astana hub ereksheligi – barlyq memorgan men jeke sektor ókilderin, jastar men ınnovatorlardy bir alańǵa jınaý múmkindigi. UNICEF únemi balalarǵa arnalǵan tehnologııalyq sheshimderdi tabý úshin ınnovatsııalardy damytýmen aınalysady. Máselen, ebola nemese zıka syndy epıdemııa adamdarmen qarym-qatynas arqyly juǵady. Sondyqtan, balalardyń qaıda júrgenin baqylaý mańyzdy. Qazir bári jelide otyrady jáne mobıldi tehnologııalar arqyly halyq kóp jınalǵan oryndardy anyqtap, juqpaly aýrýlardan saqtanýǵa bolady», - dedi Artýr van Dızen.
Zerthana seriktesterge úlken derekterdi qoldana otyryp, balalarǵa arnalǵan qoljetimdi ónimder men qyzmetterdi ınkýbatsııalaýǵa, jasandy ıntellekt, kompıýterlik oqytý, vırtýaldy álem, blokcheın jáne ózge de zamanaýı tsıfrlyq tehnologııalardy qoldanýǵa múmkindik beredi.