Úndistannyń ońtústigindegi kóshkinnen qaza tapqandar sany 41-ge jetti

<p>ASTANA. KAZINFORM - Úndistannyń ońtústigindegi Kerala shtatynda kóshkin júrip, qaza tapqandar sany 41-ge jetti. Bul týraly reseılik <a href="https://tass.ru/proisshestviya/21482733" target="_blank" rel="noopener">TASS</a> jergilikti Asianet aqparattyq portalyna silteme jasap habarlaıdy.</p>

Buǵan deıin 24 adam qaza taýyp, 70-ke jýyq adam jaraqat alǵany habarlanǵan bolatyn.

Shtattyń densaýlyq saqtaý mınıstri Vına Djordj jýrnalısterge oqıǵa aımaǵynda kópir qırap, qutqarýshylardyń jetýin qıyndatqanyn aıtty.

«Ol jerde qazirdiń ózinde ulttyq polıtsııa jáne azamattyq qorǵanys bólimsheleri jumys istep jatyr, sondaı-aq jaqyn arada teńiz kúshteri de kómekke keledi», - dedi mınıstr.

Kóshkin Úndistannyń ońtústigindegi Kerala shtatynyń soltústik-shyǵysyndaǵy Vaıanad taýly aımaǵynda júrdi. Úıindiler astynda júzdegen adam qalýy múmkin. Qaza tapqandar men jaralanǵandar sany artýy múmkin. Tótenshe oqıǵa ornynda qutqarýshylar jumys istep jatyr. Olarǵa áskerıler qosylyp, áýe kúshteriniń úsh tikushaǵy jiberildi. Olardyń jumysyna tolassyz jaýǵan jańbyr kedergi keltirip otyr.

Úndistan premer-mınıstri Narendra Modı qaza tapqandardyń otbasyna kóńil aıtyp, aqshalaı ótemaqy tóleıtinin málimdedi. Kóshkin qurbandarynyń týystaryna bılikten 200 myń úndi rýpıi (shamamen 2,4 myń dollar), al jaralanǵandarǵa 50 myń úndi rýpıi (shamamen 600 dollar) beriledi.