Úndistandyq fermerler ónim baǵasyn kóterýdi talap etip sherýge shyqty

<p>ASTANA. KAZINFORM - Úndistan polıtsııasy 2021 jyly ýáde etilgen ónim baǵasyn kóterýdi talap etip, Nıý-Delıge jetýdi josparlaǵan fermerlerdiń qozǵalysyn toqtatý úshin joldardy jaýyp tastady, dep habarlaıdy <a href="https://www.reuters.com/world/india/indian-police-block-roads-halt-farmers-marching-new-delhi-2024-02-12/" target="_blank" rel="noopener">Reuters </a>agenttigi.</p>

Úkimet músheleri aýyl sharýashylyǵy naryǵyn qaıta rettep, bir jylǵa sozylǵan narazylyqtardyń qaıtalanýyn boldyrmaý úshin dúısenbide ferma kásipodaqtarynyń jetekshilerimen kezdesedi dep kútilýde.

Sherý Úndistan premer-mınıstri Narendra Modı úshinshi merzimge jeńiske jetedi dep kútiletin ulttyq saılaýǵa birneshe aı qalǵanda ótti. 

Mıllıondaǵan úndi fermerleri qýatty daýys berý blogyn qurap otyr, al bıleýshi partııalar, óz kezeginde, olardy óz jaǵynda ustaýǵa tyrysady. 

Televızııalyq kadrlarda Úndistannyń soltústigindegi Pendjab jáne Harıana shtattarynan traktorlardy Delıge qaraı aıdap bara jatqan fermerlerdi kórýge bolady, olardyń qozǵalysyna tosqaýyl qoıý úshin qala shetine tikenek symdar men tsement blokty qorshaýlar ornatyldy. Polıtsııa sonymen qatar Delıde qoǵamdyq jıyndarǵa tyıym salý týraly buıryq shyǵardy. 

Fermerler kásipodaq basshylarynyń úndeýimen kóshelerge shyǵyp, ónimderiniń baǵasyn kóterýdi, úkimettiń kiristerin eseleımiz degen ýádesin oryndaýyn talap etýde.