Úndistandaǵy áýe kúshteriniń avıashoýynda 5 adam qaza taýyp, 100 adam aýrýhanaǵa tústi

<p>ASTANA.KAZINFORM &ndash; Úndistan Áskerı-áýe kúshteriniń áýedegi múmkindigin tamashalaýǵa arnalǵan avıashoý joǵary temperatýra men adamdardyń kóp jınalýyna baılanysty qaıǵyly&nbsp; aıaqtaldy. Jergilikti bılik adamdardyń kóptep aýrýhanaǵa túsýi men ólimine negizgi sebepti sýdyń joqtyǵymen baılanystyryp otyr. Bul týraly <a href="https://aninews.in/news/national/general-news/all-5-people-died-to-excessive-heat-says-tn-health-minister-ma-subramanian-on-chennai-air-show-incident20241007104133/" target="_blank" rel="noopener">ANI</a> agenttigi jazdy.&nbsp;</p>

Jeksenbide Tamıl Nadý shtatynyń Chennaı qalasyndaǵy Marına-Bıch jaǵajaıynda Úndistan áýe kúshteriniń 92 jyldyǵyna arnalǵan áýe shoýyn tamashalaýǵa shamamen 15 myń adam jınaldy. Avıashoý saǵat 11.00-de bastalyp, 13.00-ge deıin jalǵasqan. 

Polıtseılerdiń aıtýynsha, adamdardyń tunshyǵyp, esin joǵaltýyna shoýdy tamashalaýǵa kelgen halyqtyń kóptigi jáne uıymdastyrý jumystarynyń tómen bolýy birden-bir sebep bolǵan. 

– Qatty ystyqtan, adamnyń kóptiginen aýa jetpeı álsiregen 10 adam esinen tanyp qalǵan. Olarǵa memlekettik mekemede kómek kórsetildi, - dedi polıtsııa ókili.

Foto: ANI

Jalpy sany atalǵan is-shara kezinde 230 adam esinen tanyp qalǵan. Sondaı-aq 5 kórermen kóz jumyp, 100-ge jýyq adam aýrýhanaǵa jetkizilgeni belgili boldy.

Aıta keteıik, bul –Úndistan áýe kúshteriniń Delıden tys jerde úshinshi ret, Ońtústik Úndistanda birinshi ret áýe shoýyn ótkizýi. 2023 jyldyń qazan aıynda Áskerı-áýe kúshteri Praıagrajda jáne 2022 jyly Chandıgarhta áýe shoýyn ótkizgen edi. 

Eske salsaq, buǵan deıin Úndistanda festıval kezinde 46 adamnyń sýǵa batyp ketkenin jazǵan edik.