Úndistanda Google Maps kólikti aıaqtalmaǵan kópirge baǵyttap, úsh adam qaza tapty

<p>ASTANA.KAZINFORM - Úndistanda Ýttar-Padesh shtatyndaǵy Barelı aýdanynda Google Maps qoldanbasy kólikti qatelesip salynyp jatqan kópirge baǵyttap, kólik ózenge qulap, saldarynan úsh adam qaza tapty, dep jazady <a href="https://www.indiatoday.in/india/story/up-men-google-maps-car-incomplete-bridge-bareilly-river-fall-dead-police-investigation-2639395-2024-11-24?utm_source=Newspresso&amp;utm_medium=read_more&amp;utm_campaign=tracking" target="_blank" rel="noopener">India Today</a>.</p>

Oqıǵa senbi kúni bolǵan. Zardap shekkender úılený toıyna qatysý úshin Gýrgaonnan Barelıge bara jatqan jáne navıgatsııa úshin Google Maps qoldanbasyna júgingen. Aqyrynda GPS olardy aıaqtalmaǵan kópirge aparǵan.

Kólik kópirden ótip ketip, Ramganga ózenine shamamen 15 metr bıiktikten qulaǵan.

Jergilikti turǵyndar qıraǵan kólikti qaza tapqan jolaýshylarymen qosa kelesi kúni tańerteń tapty. Olar polıtsııaǵa habarlaǵan.

- Búgin tańǵy saǵat 9:30-da Ramganga ózeninen búlingen kólik tabyldy. Polıtsııaǵa habarlandy. Polıtsııa qyzmetkerleri kelgen kezde Wagon R kóligin kórdi. Kólik qurylysy aıaqtalmaǵan kópirge shyǵyp, ózenge qulaǵan, - dep habarlady polıtsııa.

Qaza bolǵandardyń týystary qurylysy bitpegen kópirge nege qorshaýlar ornatylmaǵanyn surap, oqıǵaǵa jaýapty sheneýnikterdi kinálady.

Aıta keteıik, qarashanyń ortasynda Úndistannyń soltústiginde aýrýhanadan órt shyǵyp, 10 sábıdiń ómirin qıǵan bolatyn.