Úndistanda festıval kezinde 46 adam sýǵa batyp ketti

<p>ASTANA. KAZINFORM &ndash; Úndistannyń shyǵysyndaǵy Bıhar shtatynda balalardyń ıgiligine arnalǵan úsh kúndik festıval kezinde kem degende 46 adam ózenge aǵyp ketti. Olardyń 37-si bala, 7-i áıel. Bul týraly Hindustan Times basylymyna silteme jasap <a href="https://belta.by/world/view/ne-menee-37-detej-utonuli-v-indii-vo-vremja-svjaschennogo-omovenija-664090-2024/" target="_blank" rel="noopener">Belta </a>agenttigi habarlady.</p>

Basylymnyń málimetinshe, jyl saıynǵy “Jıvıtpýtrıka Vrat” festıvali negizinen Úndistannyń soltústiginde jáne Nepaldyń bir bóliginde toılanady. Merekede áıelder 24 saǵat boıy oraza ustap, balalarynyń uzaq ómir súrýi men densaýlyǵy úshin arnaıy duǵalar oqıdy. Oraza kezinde analar keıde balalarymen birge jergilikti ózen-toǵandarǵa shomylýǵa barady. Úndistannyń soltústigindegi jergilikti bılik ádette festıval kezinde polıtsııa qyzmetkerlerin ornalastyrady. Alaıda bıylǵy festıval kezinde Bıhar shtatynda qandaı qaýipsizdik sharalary qabyldanǵany belgisiz.

Úndistanda dinı merekeler kezinde jappaı sýǵa batyp ketýden basqa kóptegen ólim-jitim oryn alatyny atap ótildi. Jergilikti polıtsııa qyzmetkeriniń aıtýynsha, shtattyń 15 aýdanyndaǵy ártúrli ózen men toǵandarda adam ólimi tirkelgen. Atap aıtqanda, Aýrangabad aýdanynyń eki aýylynda kámeletke tolmaǵan segiz bala sýǵa batyp ketken. Jergilikti turǵyndar sońǵy kúnderi tolassyz jaýǵan jaýyn-shashyn saldarynan ózender men toǵandardaǵy sý deńgeıi kóterilgenin habarlady. Biraq festıvalge qatysýshylar buǵan mán bermegen jáne balalardyń jappaı sýǵa ketýine basty sebep osy ekeni aıtylýda.

Bıhar shtatynyń sheneýnikteri zardap shekken árbir otbasyna ótemaqy tólenetinin málimdedi.