Úndistanda eki órt saldarynan 11 adam qaza tapty

<p>Jergilikti BAQ-tyń habarlaýynsha, búgin Úndistanda eki jerde órt bolyp, 11 adam qaza tapqan, 40-qa jýyq turǵyn zardap shekti.</p>

QazAqparat bul týraly Xinhua agenttigine silteme jasap habarlaıdy.

Úndistannyń ońtústik-batysyndaǵy Maharashtra shtatynyń astanasy Mýmbaı qalasynyń Goregaon aýdanynda kópqabatty ǵımarattan órt shyǵyp, jeti adam mert boldy, 40-qa jýyq turǵyn jaraqat alǵan.

Zardap shekkenderdiń beseýiniń jaǵdaıy óte aýyr, al tórt turǵyn alǵashqy kómek alǵannan keıin aýrýhanadan shyǵarylǵan.

BAQ keıingi aqparaty boıynsha, órt baqylaýǵa alyndy, ony sóndirý jalǵasyp jatyr. Órt tutanýǵa baılanysty tergeý bastaldy.

Qolda bar derekter boıynsha, órt túngi 3 shamasynda turaqta bastalǵan, dep habarlady News18.

Qaza tapqandardyń bireýi er adam bolsa, beseýi – áıel, onyń ekeýi – kámeletke tolmaǵan bala. Jaralanǵandardyń qatarynda 12 er adam men 28 áıel bar, bireýi kámelet jasyna tolmaǵan.

Órtpen kúresýge segiz órt sóndirý kóligi jumyldyryldy.

Beısenbiden jumaǵa qaraǵan túni Pendjab shtatynyń Amrıtsara aýdanyndaǵy farmatsevtıka zaýytynda tutanǵan taǵy bir qyzyl jalyn tórt jumysshynyń ómirin qıǵan.

Zaýytta saqtalǵan kóptegen hımıkat órtke ákelgen bolýy kerek. Degenmen oqıǵaǵa ne sebep bolǵany naqtylanǵan joq.

Órt tutanǵan kezde fabrıkada jumys júrip jatqan, ǵımarat ishinde jumysshylar bolǵan. Órt sóndirý qyzmetiniń uıymdasqan jumysy jalyndy baqylaýǵa alýǵa kómektesti.

Qazirgi ýaqytta qutqarý jumystary jalǵasyp, shyǵyn kólemi eseptelip jatyr. Tergeý oqıǵanyń sebebi men adamdardyń ólimine naqty ne sebep bolǵanyn anyqtaıdy, dep habarlady PTC News.