Úndistan temirjolynda taǵy da iri apat boldy

<p>Jeksenbi kúni Úndistanda jolaýshy tasymaldaıtyn eki poıyz soqtyǵysyp, saldarynan kem degende 13 adam qaza tapty, taǵy 50-ge jýyq adam jaraqat aldy. Kazinform bul týraly&nbsp;<a href="https://www.bbc.com/news/world-asia-india-67234331" target="_blank" rel="noopener">BBC-ge</a>&nbsp;silteme jasap habarlaıdy.</p>

Apat eldiń soltústigindegi Andhra-Pradesh shtatynda oryn alǵan. Oqıǵa ornyna júzdegen qutqarýshy dereý jetken.

Tergeýdiń aldyn ala málimeti apatqa «adamnyń qateligi» sebep bolǵanyn kórsetti.

Premer-mınıstr Narendra Modı oqıǵaǵa baılanysty kóńil aıtyp, temirjol mınıstrimen baılanysta ekenin jetkizdi.

Vıshakhapatnam men Palasa arasynda kele jatqan jolaýshylar poıyzy jergilikti ýaqytpen keshki saǵat 19:00 shamasynda basqa poıyzben soqtyǵysyp, úsh vagon relsten shyǵyp ketken. Temirjol qyzmetkeriniń Reuters agenttigine habarlaýynsha, Vıshakhapatnam men Raıagada baǵytyndaǵy ekinshi jolaýshylar poıyzy ony art jaǵynan soqqan kezde aspaly trostyń úzilýinen temir jol boıynda toqtap qaldy.

Jolaýshylardy qutqarý jáne adamdardyń denelerin shyǵarý úshin oqıǵa ornyna júzdegen jedel járdem, dárigerler, meıirgerler men qutqarýshylar jiberildi.

Úndistan kún saıyn mıllıondaǵan jolaýshy tasymaldaıtyn álemdegi kóshbasshy elderdiń biri. Alaıda, temirjol ınfraqurylymynyń kóp bóligi jóndeýdi qajet etedi.

Eske salaıyq, birneshe aı buryn ǵana atalǵan eldiń shyǵysyndaǵy Odısha shtatynda úsh poıyz soqtyǵysyp, 292 adam qaza tapty, taǵy myńdaǵan adam jaraqat aldy.