Úndistannan Qazaqstanǵa keletin týrıster sany 35 paıyzǵa artty
Sharaǵa Tamıl-Nadý shtatynyń 15-ke jýyq týrıstik kompanııasy qatysty.
Qazaqstan Respýblıkasynyń Úndistandaǵy Elshisi Bolat Sársenbaev eki el arasyndaǵy týrıstik yntymaqtastyqtyń joǵary qarqynyn atap ótti.
Onyń sózine qaraǵanda, 2017 jyldyń birinshi toqsanynda ótken jyldyń sáıkes kezeńimen salystyrǵanda Úndistannan Qazaqstanǵa kelgen týrıster sany 35 paıyzǵa artty. Úndistandyq qonaqtardy negizinen Almaty men Astana syndy qalalardaǵy mádenı-tanymdyq demalys qyzyqtyrady. Elshi sondaı-aq «EKSPO» halyqaralyq mamandandyrylǵan kórmesi sózsiz, 2017 jyldyń basty sharasy bolatynyn tilge tıek etip, bul Qazaqstanǵa keletin týrıster úshin eldiń týrıstik áleýetin keńirek tanytýǵa jaqsy negiz ekendigin atap ótti.
Sondaı-aq dıplomat Qazaqstanǵa saparlaıtyn úndistandyq týrıster sanynyń artýyna Air Astana kompanııasynyń «Almaty-Delı-Almaty» baǵytyndaǵy kún saıynǵy reısteri yqpal etip otyrǵanyn aıtty.
«Aǵymdaǵy jyldyń maýym aıynda «Astana-Delı-Astana» reısin ashý josparlanýda jáne áýe tasymaldaýshy «EKSPO-2017» kórmesine tegin bılet usyný boıynsha aktsııa uıymdastyratyn bolady. Jalpy, Qazaqstan men Úndistan arasynda jolaýshylardyń áýemen qatynaý jıiligin aptasyna 24 reıske deıin arttyrý kózdelýde», - dedi B.Sársenbaev.
Eske salaıyq, 2017 jyldyń 26 sáýirinde Úndistannyń Tamıl-Nadý shtatynyń Chennaı qalasynda Qazaqstan Respýblıkasynyń Qurmetti konsýldyǵy ashyldy .