Úndistannan Qazaqstanǵa keletin adamdar sany 4 ese artty

DELI. QazAqparat - 2018 jyly Úndistan azamattaryna 25 myńnan astam vıza berildi, bul 2014 jylǵy kórsetkishten 4 esege artyq. Bul jaıly Qazaqstan Respýblıkasynyń Úndistandaǵy Elshisi Bolat Sársenbaev Delı qalasynda ótken «Qazaqstan-Úndistan qatynastary: ótkeni, búgini, bolashaǵy» atty dóńgelek ústelde málim etti, dep habarlaıdy «QazAqparat» HAA menshikti tilshisi.

«Nur-Sultan men Delı arasyndaǵy yntymaqtastyq qarqyndy damyp, eki eldiń azamattarynyń ózara saparlary kóbeıip keledi. Eger 2014 jyly Qazaqstan Úndistan azamattaryna 6 myńǵa jýyq vıza jiberse, 2018 jyly bul kórsetkish 25 myńnan asty», - dedi elshi.

Onyń aıtýynsha buǵan Úndistan astanasy men Almaty jáne Nur-Sultan qalalary arasyndaǵy arasyndaǵy 11 kúndelikti áýe marshrýty, sondaı-aq 2015 jyly Mýmbaıda, 2017 jyly Chennaı jáne 2018 jyly Gandınagarda Qazaqstannyń qurmetti konsýldarynyń ashylýy sebep boldy.

«Bizdiń yntymaqtastyǵymyzdyń basym baǵyttary - ǵarysh, aqparattyq tehnologııalar, qarjylyq tehnologııalar, energetıka jáne áskerı-tehnıkalyq yntymaqtastyq. Qazaqstan Ortalyq Azııadaǵy Úndistannyń negizgi saýda seriktesi bolyp tabylady. Bizdiń elderimiz arasyndaǵy taýar aınalymy 2018 jyly 1,2 mıllıard dollarǵa jetti, al 2015 jyly ol 461,6 mıllıon dollardy quraǵan bolatyn. Ústimizdegi jyldyń alǵashqy úsh aıynda Qazaqstan men Úndistan arasyndaǵy eki jaqty saýdanyń kólemi 293,1 mln dollardy qurady, bul ótken jyldyń sáıkes merzimimen salystyrǵanda 35,9% -ǵa kóp», - dedi B.Sársenbaev.

B.Sársenbaev Qazaqstandaǵy aldaǵy prezıdenttik saılaý týraly, sondaı-aq Úndistanda turatyn jáne ýaqytsha turatyn Qazaqstan azamattary úshin Úndistan Respýblıkasyndaǵy QR Elshiliginde saılaý ýchaskesiniń ashylýy týraly aıtyp berdi. Dóńgelek ústel barysynda Delıde ashylǵan «KazakhInvest» ulttyq kompanııasy ókildiginiń tusaýy kesildi, onyń jetekshisi Aıgúl Nuralına Qazaqstan ekonomıkasyna ınvestıtsııa salýǵa múddeli úndilik kompanııalarǵa usynylǵan aqparattyq jáne konsaltıngtik qyzmetterdiń aýqymy týraly baıandady.

Erkin pikirtalas barysynda dóńgelek ústel qatysýshylary, úkimettik, iskerlik jáne qoǵamdyq toptar, ǵylymı-zertteý ınstıtýttary men saraptamalyq ortalyqtar ókilderi Qazaqstan men Úndistan arasyndaǵy yntymaqtastyqty damytýdyń túrli aspektilerin talqylady.