Úndistanda táýligine 2 myńnan astam adam koronavırýstan kóz jumýda

NUR-SULTAN. QazAqparat – Bir apta boıy Úndistan táýlik ishinde koronavırýs juqtyrǵandar sany boıynsha álemdik rekord ornatýda, dep habarlaıdy QazAqparat BBC-ge silteme jasap.

Birinshi tolqynda táýligine ortasha alǵanda 93 myń turǵyn koronavırýs júutyrǵan. 17 sáýirden bastap kúndelikti statıstıka 200 myń adamǵa deıin kóterilip, sońǵy aptada kúnine 350 myń adamǵa jetip otyr.

Ólim sany da birinshi tolqynmen salystyrǵanda eki esege artty. Sońǵy aptada táýligine Úndistanda koronavırýstan ortasha 2 336 adam qaıtys bolýda.

Eldegi eń aýyr jaǵdaı Delıde, munda aýrýhanalarda ÓJJA ornatylǵan oryndar qalmaǵan.

Basqa iri qalalarda da jaǵdaı osyndaı. Resmı statıstıka boıynsha, pandemııanyń basynan beri Úndistanda 17 mln adam koronavırýs juqtyryp, 192 myń adam qaıtys bolǵan.

Halyq sanynyń kóptigi jáne olardyń udaıy jyljyp otyrýy Covid-19-ǵa testileý ótkizýge jáne naqty ólim sany boıynsha esep júrgizýge kedergi keltiredi. Sol sebepti Úndistandaǵy daǵdarystyń shynaıy masshtabyn baǵalaý qıynǵa soǵyp otyr.

BBC tilshisiniń aıtýynsha, eldegi masshtabty vaktsınalaý baǵdarlamasy úlken qıyndyqtarǵa tap bolýda. Bul baǵdarlama 16 qańtar kúni bastalǵan, shildege deıin 250 mln adamdy vaktsınalaýdy kózdegen. Qazirgi kezde vaktsınanyń birinshi dozasyn 118 mln adam ǵana alǵan, bul – halyqtyń 9%-y.

«Pandemııa bizge barlyq el problemalarynyń ortaq ekendigin túsindirdi. Bir Qytaı qalasynda paıda bolǵan koronavırýs endi búkil álemde», - deıdi BBC tilshisi Djeıms Gallaher.

Juqtyrý rekordy Úndistan shekarasyn asýy múmkin, sol sebepti kóp elder bul elmen áýe qatynasyn toqtatty.

Brıtanııa, Brazılııa jáne Ońtústik Afrıkada paıda bolǵan koronavırýstyń jańa túri ózge elderde úlken problemalar týdyrdy. Fızıka jáne bıologııa professory, juqpaly aýrýlardy modeldeý salasyndaǵy sarapshy Menon Úndistanda vırýstyń jańa túri paıda bolýy múmkin ekendigin eskertti.

Dúnıejúzilik qaýymdastyq Úndistanǵa daǵdarysty jeńýge kómek kórsetýde. Ulybrıtanııa elge ÓJJA jáne koıýlanǵan ottek qorlaryn jiberdi, AQSh Úndistanǵa AstraZeneca vaktsınasyn kóp mólsherde óndirýge múmkindik berý úshin bastapqy materıaldar eksportyna tyıymdy ýaqytsha alyp tastady. Kóptegen elder bilikti qyzmetkerler men jeke qaýipsizdik quraldaryn usynýda.