Úndistanda mýsson jańbyrynan keıingi tasqynnan 100-den asa adam kóz jumdy

LONDON. QazAqparat - Úndistannyń soltústiginde sý tasqynynan 100-den astam adam qaza tapty. Kóshkin men sý tasqynyna ákep soqqan mýsson jańbyry birneshe kúnnen beri tolastamaı otyr, dep habarlaıdy QazAqparat Euronews agenttigine silteme jasap.

Úndistannyń soltústiginde osy aptada jaýǵan nóser jańbyr 100 adamnyń ómirin qıyp, alasapyran týǵyzdy.

Ólim-jitimniń kóbi Hımachal-Pradesh taýly shtatynda tirkelgen. Onda kólikterdi, avtobýstar, kópirler men úılerdi qýatty sý tasqyny shaıyp ketken, aımaqta laı kóshkini júrdi.

Nıý-Delıde Djamýna ózeniniń jaǵalaýyndaǵy tutas aýdandar, sonyń ishinde birneshe úkimettik ǵımarattar sý astynda qalǵan.

Myńdaǵan adam evakýatsııalanyp, mektepter men kolledjder jabyldy.

Bılik ókilderiniń aıtýynsha, bul - Úndistanda sońǵy onjyldyqtarda bolǵan eń kúshti mýsson.

Meteorologtar aldaǵy kúnderi eldiń soltústik aımaqtarynda taǵy da jaýyn-shashyn bolady dep boljap otyr.